Presidenti amerikan Donald Trump dhe administrata e tij kanë paraqitur një apel në Gjykatën e Lartë të SHBA-së duke kërkuar kufizimin e kompetencave të gjyqtarëve për të bllokuar vendimet dhe rregulloret e agjencive federale në nivel kombëtar. Departamenti i Drejtësisë kërkon që gjykatat të mos kenë më të drejtën të shfuqizojnë në tërësi rregulloret e agjencive, edhe kur ato konsiderohen të paligjshme, dhe se vendimet gjyqësore duhet të zbatohen vetëm për palët që kanë ngritur padinë dhe jo për gjithë qytetarët ose subjektet e tjera.
Kërkesa vjen pas valës së padive kundër masave të administratës që nga rikthimi i Trump në Shtëpinë e Bardhë, në janar 2025, ndër të cilat përfshihen çështje për emigracionin, dëbimet masive, programet e diversitetit dhe të drejtat e personave transgjinorë. Në qershor 2025, Gjykata e Lartë kishte vendosur tashmë kufizime ndaj urdhrave me efekt kombëtar që pengonin zbatimin e politikave qeveritare për të gjithë.
Çështja aktuale në Gjykatën e Lartë lidhet me rregullat për faturat e papritura mjekësore, të cilat synojnë të mbrojnë pacientët nga tarifat e larta të spitaleve dhe ofruesve jashtë rrjetit të sigurimit. Sipas Reuters, një grup ofruesish shëndetësorë në Teksas kundërshtoi rregulloren, duke pretenduar se shkelte ligjin dhe zvogëlonte në mënyrë artificiale pagesat nga kompanitë e sigurimeve; në gusht, Gjykata Federale e Apelit rrëzoi disa pjesë të saj në nivel kombëtar. Administrata në apel nuk po konteston nëse rregullorja ishte e ligjshme, por kërkon që efekti i vendimit të kufizohet vetëm te palët që kanë ngritur padinë.
Ekspertët ligjorë paralajmërojnë se, nëse Gjykata e Lartë pranon kërkesën, qeveria mund të vazhdojë të zbatojë rregullore në shkallë kombëtare edhe kur gjykatat i shpallin të paligjshme, me përjashtim të palëve që fitojnë çështjen. Disa shtete, përfshirë Teksasin dhe Floridën, kanë kundërshtuar kufizimin e kompetencave, duke argumentuar se Akti i Procedurave Administrative i vitit 1946 është një instrument thelbësor për të mbrojtur shtetet nga ndërhyrjet e tepruara të qeverisë federale.
