Liderë dhe diplomatë nga e gjithë bota mblidhen në Nju Jork për Asamblenë e Përgjithshme të Kombeve të Bashkuara, ku pritet të trajtohen çështje kyçe të diplomacisë ndërkombëtare. Në fokus të diskutimeve janë luftërat në Ukrainë dhe në Lindjen e Mesme, marrëdhëniet mes fuqive të mëdha, çështja palestineze, inteligjenca artificiale dhe e ardhmja e vetë organizatës.
Presidenti amerikan Donald Trump pritet të zhvillojë një sërë takimesh dypalëshe me liderë të huaj, ndërsa prania në Nju Jork e presidentit ukrainas Volodymyr Zelensky vendos në qendër të vëmendjes temën e luftës në Ukrainë dhe përpjekjet diplomatike për t’i dhënë fund konfliktit. Lindja e Mesme mbetet çështje kryesore; Franca organizon një takim mbi zgjidhjen me dy shtete për konfliktin izraelito-palestinez, ndërkohë që presidenti palestinez Mahmoud Abbas do t’i drejtohet Asamblesë përmes videos pasi administrata amerikane nuk i dha vizë për të udhëtuar në SHBA.
Nga delegacionet kryesore pritet pjesëmarrja e ministrit të Jashtëm rus Sergey Lavrov, i cili do të takohet me Sekretarin amerikan të Shtetit, Marco Rubio. Delegacioni iranian, përfshirë presidentin Masoud Pezeshkian, gjithashtu do të marrë pjesë në punimet e Asamblesë. Një tjetër temë kryesore është inteligjenca artificiale; OKB-ja pritet të diskutojë ndikimin e teknologjisë së re dhe nevojën për rregulla ndërkombëtare për përdorimin e saj.
Asambleja zhvillohet në një moment të rëndësishëm për vetë OKB-në, teksa Sekretari i Përgjithshëm António Guterres po përgatitet të largohet nga detyra në fund të vitit dhe gara për pasardhësin e tij vijon. Në axhendë është edhe situata financiare e organizatës: Shtetet e Bashkuara kanë paguar 827 milionë dollarë në kuota ndaj OKB-së, ndërsa organizata vazhdon të përballet me sfida financiare.
Me më shumë se 130 krerë shtetesh dhe qeverish të pranishëm, Asambleja pritet të shërbejë si platformë për takime dypalëshe, negociata dhe diskutime mbi konfliktet dhe sfidat kryesore globale.
