Mbretëria e Bashkuar dhe dhjetëra vende evropiane nënshkruan një deklaratë të përbashkët që synon t’u japë shteteve më shumë kompetenca për deportimin e migrantëve të paligjshëm dhe kërkon që Gjykata Evropiane e të Drejtave të Njeriut të tregojë më shumë fleksibilitet në çështjet e migracionit. Marrëveshja, prezantuar në një samit në Moldavi, paralajmëron se demokracitë evropiane mund të rrezikohen nëse shtetet nuk reagojnë më efektivisht ndaj kontrabandës së njerëzve dhe presioneve migratore.
Deklarata i kërkon gjyqtarëve në Strasburg më shumë liri për vendimmarrje lidhur me migracionin dhe deportimet, duke marrë parasysh interesin publik dhe sigurinë kombëtare. Sekretarja e Brendshme britanike, Yvette Cooper, e përshkroi marrëveshjen si një “qasje të bazuar në logjikën e shëndoshë”, duke theksuar se sistemet aktuale nuk duhet të “manipulohen padrejtësisht”. Dokumenti nuk ndryshon Konventën Evropiane për të Drejtat e Njeriut, por shihet si një sinjal politik drejt Gjykatës së Strasburgut për mënyrën e interpretimit të çështjeve të migracionit. BBC raporton se deklaratën e kanë nënshkruar 46 vende anëtare të Këshillit të Evropës.
Teksti nënvizon të drejtën sovrane të shteteve për të përcaktuar politikat e emigracionit dhe për të larguar shtetas të huaj në interes të publikut. Një fokus i rëndësishëm është kontrabanda e njerëzve dhe përdorimi të migracionit si mjet presioni nga aktorë armiqësorë, që rrezikon të minojë besimin në sistemin evropian të të drejtave të njeriut. Deklarata mbështet gjithashtu mundësinë që vendet të krijojnë “qendra kthimi” jashtë Evropës për migrantët e refuzuar; si shembull përmendet marrëveshja e Italisë me Shqipërinë për strehimin e disa migrantëve. Mbretëria e Bashkuar po shqyrton modele të ngjashme, por ende pa marrëveshje konkrete.
Dokumenti trajton edhe deportimet në vende me standarde më të ulëta sociale apo shëndetësore, duke thënë se gjykatat nuk duhet t’i ndalojnë automatikisht deportimet vetëm sepse kushtet janë më të dobëta. Megjithatë, deklarata rithekson se ndalimi i torturës dhe i trajtimit çnjerëzor mbetet absolut sipas Nenit 3 të Konventës. Kritikët paralajmërojnë se formulimi mund të dobësojë mbrojtjen e të drejtave të njeriut dhe vënë në dyshim nëse gjyqtarët e Strasburgut do ta marrin parasysh këtë deklaratë.
