Pas martesës së tyre sekrete, vëmendja u përqendrua te marrëveshja paramartesore që Cristiano Ronaldo dhe Georgina Rodriguez kanë lidhur për pasurinë dhe të ardhmen financiare në rast ndarjeje. Sipas raportimeve të publikuara nga Marca, marrëveshja parashikon një mbështetje financiare të përjetshme për Georginën, me një shumë të raportuar rreth 100 mijë euro në muaj, pra afërsisht 1.2 milionë euro në vit. Ky detaj ishte përmendur edhe më parë nga media që i referohej një marrëveshjeje financiare të çiftit.
Përveç pagesës mujore, marrëveshja parashikon që, në rast ndarjeje, vila familjare e çiftit në kompleksin luksoz La Finca në Madrid do t’i mbetet Georginës si pronë e saj. Dokumenti synon të përcaktojë paraprakisht ndarjen e pasurive dhe detyrimet financiare, me qëllim shmangien e një përplasjeje të gjatë ligjore dhe mbrojtjen e interesave të fëmijëve.
Detajet e marrëveshjes u rikthyen në vëmendje pak ditë pasi Ronaldo dhe Georgina zyrtarizuan martesën. Çifti u martua më 11 gusht në një ceremoni private në rezidencën e Ronaldos në Cascais, pranë Lisbonës, në prani të katër dëshmitarëve dhe fëmijëve të tyre. Një ditë më parë, më 10 gusht, ata formalizuan edhe marrëveshjen paramartesore, duke përcaktuar regjimin e tyre pasuror.
Ronaldo ka ndërtuar një pasuri të konsiderueshme nga kontratat në futboll, bizneset dhe marrëveshjet komerciale, dhe pronësia e tij përfshin një perandori financiare prej qindra milionë eurosh. Për këtë arsye, marrëveshja paramartesore shihet si një mënyrë për të mbrojtur pasurinë e tij, ndërsa njëkohësisht garanton sigurinë financiare të Georginës dhe fëmijëve në rast të një ndarjeje.
Raportimet që zbuluan këto detaje i rikthejnë vëmendjen rregullimeve financiare që çiftet e famshme vendosin për të menaxhuar pasuritë e përbashkëta dhe për të parashikuar skenarë ndarjeje pa përplasje ligjore.
