Gjykata në Amiens rrëzoi kërkesën për lirim të biznesmenit Ermal Beqiri, duke vendosur që ai të vazhdojë qëndrimin në paraburgim në Francë. Vendimi u shpall të premten, më 23 tetor 2026, tre ditë pas shqyrtimit fillestar nga Dhoma e Hetimit, e cila më parë kishte kërkuar informacion shtesë përpara marrjes së një vendimi mbi ekstradimin.
Beqiri, banues në pronën e njohur si Château d’Auteuil në Berneuil-en-Bray, departamenti Oise, kundërshton ekstradimin drejt Shqipërisë. Autoritetet shqiptare, përmes SPAK, dyshojnë se ai ka qenë pjesë e një rrjeti të dyshuar që organizonte përfitimin e tenderëve në fushën e teknologjisë së informacionit, duke shtrembëruar konkurrencën dhe përdorur intimidimin. Pas dërgimit të dokumentacionit shtesë nga autoritetet shqiptare përmes kanaleve zyrtare, çështja u shqyrtua në themel në seancën e fundit.
Gjatë seancës, Beqiri vuri në dyshim besueshmërinë e sistemit të drejtësisë në Shqipëri dhe deklaroi se çështja ndaj tij ka sfond politik, duke thënë sipas mediave franceze: “Nëse kam korruptuar dikë, atëherë është shteti. Por nga ajo anë, askush nuk është në burg. Ka gjithsesi një problem.” Ai pretendoi po ashtu se rasti është “tërësisht politik”.
Nga ana tjetër, Prokuroria e Përgjithshme pranë Gjykatës së Apelit në Amiens mbështeti kërkesën për ekstradim drejt Shqipërisë. Përfaqësuesja e akuzës argumentoi se detyra e gjykatës franceze nuk është të bëjë një vlerësim të përgjithshëm mbi sistemin gjyqësor shqiptar, por të shqyrtojë kërkesën për ekstradim dhe dokumentacionin e paraqitur. Ajo iu referua gjithashtu hetimeve kundër korrupsionit në Shqipëri, duke e përshkruar situatën si një proces të gjerë pastrimi të sistemit.
Aktualisht, Ermal Beqiri do të qëndrojë në paraburgim në Francë, ndërsa vendimi për ekstradimin drejt Shqipërisë mbetet për t’u marrë nga autoritetet gjyqësore franceze. (Top Channel)
