Ish-trajneri Fabio Capello ka kritikuar ashpër sistemin e arbitrazhit dhe përdorimin e VAR-it në futboll. Në një intervistë për gazetën spanjolle Marca, ai ka theksuar se menaxhimi i teknologjisë së VAR-it është problematik dhe ka bërë një paralel me skandalin e famshëm të Calciopoli në Itali, duke e krahasuar atë me skandalin e Negreira-s në Spanjë.
Capello e përshkroi VAR-in si një “kastë e mbyllur” dhe akuzoi arbitrat se veprojnë si një “mafia,” që nuk pranojnë të punojnë me ish-lojtarë për të ndihmuar në vendim-marrjet e tyre. Ai vuri në dukje se shumë arbitra marrin vendime të gabuara sepse nuk kanë pasur asnjëherë eksperiencë në fushën e lojës. Në një shembull konkret, ai përmendi se një lojtar që pëson një goditje në fytyrë, bie dhe arbitri vendos të gjobit, një situatë që sipas tij është irrituese.
Capello ofron një zgjidhje të thjeshtë për këtë problem: të emërohet një ish-lojtar ose ish-trajner që të asistojë arbitrat në vlerësimin e rasteve të penalltive. Ai e mbështeti këtë propozim me një analizë në të cilën, nga 20 penallti të shqyrtuara nga profesionistë të kaluar, vetëm 6 rezultuan të ishin të sakta.
Përveç kritikave për sistemin e VAR-it, Capello u ndal edhe tek skandali i Negreira-s, në të cilin Barcelona akuzohet për pagesa të bëra ish-nënkryetarit të Komitetit Teknik të Arbitrave spanjollë. Ai kujtoi arritjet e tij në La Liga me Real Madridin në ato vite, duke theksuar se pavarësisht përpjekjeve për t’i penguar, ai arriti të fitojë, në një mënyrë që i jep edhe më shumë vlerë titujve të tij.
Capello e përfundoi diskutimin e tij duke bërë një krahasim me ngjarjet e Calciopoli-t në vitin 2006, ku Juventus nuk pagoi arbitrat, por megjithatë përfundoi në Serie B, ndërsa në rastin e Negreira-s, sipas tij, nuk ka ndodhur asgjë ndëshkuese në Spanjë. Ai vuri në dukje se Italia vepron më seriozisht në këto çështje.
