Është depozituar në Kuvend projektligji për buxhetin e vitit 2026, i cili pritet të jetë buxheti më i madh në histori, me një vlerë totale prej 886 miliardë lekësh ose 8.9 miliardë euro. Ky buxhet do të fokusojë shpenzimet në sektorë kryesorë si shëndetësia, mbrojtja sociale, infrastruktura, arsimi, bujqësia dhe mbrojtja në kuadër të angazhimeve ndaj NATO-s.
Shpenzimet për vitin e ardhshëm pritet të rriten me 6.7% në krahasim me vitin e mëparshëm, ndërsa të ardhurat planifikohen të arrijnë në 823 miliardë lekë, ose 8.2 miliardë euro, që përbën një rritje prej 6.8%. Ministria e Shëndetësisë do të marrë pjesën më të madhe të buxhetit, me 82.5 miliardë lekë, duke përfshirë 100 milionë euro për rritjen e pensioneve dhe 135 milionë euro për rimbursimin e medikamenteve.
Ministria e Infrastrukturës është e dyta në renditjen e shpenzimeve, me 772 milionë euro. Buxheti i Ministrisë së Arsimit arrin në 620 milionë euro, ndërsa Ministria e Mbrojtjes do të marrë 589 milionë euro. Ministria e Bujqësisë ndonëse merr 14 milionë euro më shumë, gjithsesi do të arrijë në 162 milionë euro për vitin 2026.
Investimet publike në projektbuxhetin e vitit 2026 janë planifikuar të arrijnë në 179.6 miliardë lekë, ose 1.8 miliardë euro, përbërë një përqindje prej 6.5% të PBB-së. Në këtë kontekst, përfshihen gjithashtu financime për rindërtimin dhe projekte duke u mbështetur në Planin e Rritjes me BE-në. Megjithatë, financimet për kontratat koncesionare dhe projektet e partneritetit publik-privat pritet të bien, duke arritur në 120 milionë euro për 11 kontrata, krahasuar me 139 milionë euro në vitin 2025.
Për pushtetin vendor, granti nga buxheti i shtetit për 61 njësitë do të rritet në 473 milionë euro nga 431 milionë euro në vitin e kaluar. Ky projektbuxhet vjen gjithashtu me një paketë fiskale, e cila përfshin ndryshime në TVSH për bujqësinë dhe indeksimin e pagave në administratë me 2.5%. Rritja e pagës minimale dhe maksimale është parashikuar të ndodhë më 1 janar 2026.
