Kryeministri Edi Rama, në një mbledhje në të cilën morën pjesë ministrat dhe që zgjati 9 orë, kërkoi ngritjen e një Bursa Bujqësore, një mekanizëm ku shteti nuk do të përcaktojë çmimet e produkteve të shportës, por synon t’i bëjë ato më transparente. Në mandatin e tij të tretë, Rama dhe ish-ministrja e Bujqësisë Frida Krifca prezantuan më parë Portalin e Fermerit, një platformë informacioni ku fermerët mund të shikonin çmimet e shumicës dhe pakicës, por shifrat e publikuara nuk korrespondonin gjithmonë me vlerat reale të tregut dhe për këtë arsye portali nuk u përqafua gjerësisht nga fermerët.
Ekspertët e ekonomisë vlerësojnë se Bursa Bujqësore, ndryshe nga Portali i Fermerit, mund të funksionojë, por angazhimi i vetëm i Ministrisë së Bujqësisë konsiderohet i pamjaftueshëm. Enio Civici thekson nevojën për mbikëqyrje financiare nga një autoritet financiar që garanton vërtetësinë e transaksioneve bankare, si dhe domosdoshmërinë e një vëllimi të mjaftueshëm tregtimi. Me ngritjen e bursës, grosistët pritet t’u përshtaten rregullave të reja, pasi formalizimi i tregut pritet të ulë fitimin e tyre dhe për pasojë çmimet e produkteve.
Ergis Sefa e konsideron idenë të mirë, duke përmendur se në vende si Greqia dhe Turqia ekzistojnë modelë të ngjashëm dhe se një bursë mund të sjellë efekt zbritës në çmimet e produkteve. Në çdo sezon bujqësor, fermerët denoncojnë abuzimet e pikave të grumbullimit që ofrojnë çmime që nuk mbulojnë kostot e prodhimit; për këtë arsye shumë herë produkti përfundon jashtë tregut, në kanal, në vend që të shitet. Source: Top Channel.
