Të dënuarit nuk do të kenë më të drejtën të drejtohen në gjykatë për ulje dënimi ose lirim të parakohshëm. Kërkesat e të burgosurve që fitojnë çdo vit gati 90 ditë zbritje për punë dhe sjellje të mirë do të shqyrtohen nga drejtoria e përgjithshme e burgjeve. Ky propozim vjen nga Poli i Drejtësisë përmes një grupi pune të ngritur për të gjetur zgjidhje ligjore që synojnë të ulin ‘back logun’ e dosjeve, veçanërisht në gjykatat administrative.
Sipas burimeve, ky propozim ka për qëllim shmangien e padive gjyqësore nga të burgosurit e sjellshëm dhe aktivë në punë, duke reduktuar kështu angazhimin e gjyqtarëve dhe stokun e dosjeve. Propozohet gjithashtu që gjykatat të zhvillojnë seancat për akuzat e lehta pa transportimin e të dënuarve, me kushtin që avokati të jetë i pranishëm. Për të shmangur zvarritjet për shkak të adresave, të interesuarit do të njoftohen për gjykimin e radhës përmes postës elektronike të mbrojtjes.
Për të lehtësuar procesin, diskutohet që trupa gjyqësore me tre gjyqtarë të reduktohet në vetëm një për çështje të thjeshta si njohja e martesës me të huaj dhe vërtetimet e fakteve. Propozohet gjithashtu që trupat gjyqësore në apel të reduktohen në një, ndërsa dhomat e këshillimit do të jenë vetëm për çështjet civile.
Grupi i punës, që përfshin anëtarë të KLGJ, KLP, dhe kryetarë gjykatash nga Tirana, po punon për të adresuar stoku që ka arritur në 160 mijë dosje. Pas diskutimeve intensive, ekspertët do të takohen për të vazhduar punën në vitet në vijim. Sapo drafti të finalizohet, do t’i propozohet drejtorisë së kodifikimit për ndërhyrje në ligj. Ministri i drejtësisë, Toni Gogu, ka deklaruar se institucionet po presin sugjerimet e qeverisë së gjyqësorit.
