BE-ja po shqyrton nisjen e një misioni trevjeçar ushtarak dhe politik në Liban për të trajnuar dhe këshilluar forcat e sigurisë së vendit, sipas një dokumenti të parë nga Reuters. Propozimi, i hartuar nga shërbimi diplomatik i Bashkimit Evropian pas një studimi mbi mënyrat për të forcuar Forcat e Sigurisë së Brendshme të Libanit, synon që ushtria libaneze të përqendrohet më shumë në çarmatosjen e Hezbollahut duke i dhënë kapacitete më të mëdha trupave të sigurisë së brendshme.
Diskutimet për misionin vijnë ndërkohë që mandati i Forcës së Përkohshme të OKB-së në Liban (UNIFIL) pritet të skadojë në fund të vitit 2026, pas së cilës parashikohet nisja e një procesi njëvjeçar tërheqjeje. Dokumenti i datës 17 qershor, i shpërndarë vendeve anëtare të BE-së, parashikon një mandat fillestar trevjeçar për misionin dhe mbështetje për autoritetet libaneze në forcimin e kontrollit territorial dhe sigurisë kufitare përmes rritjes së kapaciteteve të ushtrisë dhe policisë.
Sipas dokumentit, misioni do të ofrojë mbështetje për regjimentet kufitare tokësore, forcat mobile dhe njësitë rajonale të xhandarmërisë, si dhe do të përmirësojë aftësitë e inteligjencës, mbikëqyrjes dhe zbulimit. Gjithashtu, fokusi i misionit përfshin forcimin e sigurisë detare, menaxhimin e kufijve dhe sigurinë e porteve. Çdo veprim i tillë do të kërkonte miratimin unanim të 27 vendeve anëtare të Bashkimit Evropian.
Propozimi vjen në një situatë të ndërlikuar sigurie në Libanin jugor, ku forcat izraelite vazhdojnë të jenë të pranishme pas konfliktit të fundit me Hezbollahun. Luftimet shpërthyen pasi grupi libanez hapi zjarr ndaj Izraelit në mbështetje të Iranit, pak ditë pas sulmeve amerikane dhe izraelite ndaj Teheranit. Armëpushimi i shpallur mes Izraelit dhe Hezbollahut në fund të javës së kaluar është respektuar në masë të madhe që nga e diela, por ushtria izraelite mbetet e vendosur në pjesë të Libanit jugor, duke argumentuar se prania e saj është e nevojshme për mbrojtjen e zonave veriore të Izraelit nga sulmet e mundshme të Hezbollahut.
