Një vendim i Gjykatës së Lartë në Britani ka sjellë debate të mëdha, pasi shpalli se 70 emigrantë që aplikuan për kompensim do të marrin nga 6,600 paund secili për telefonat celularë që u janë marrë nga autoritetet britanike të emigracionit. Shuma totale e kompensimeve arrin në gjysmë milioni paund, ndonëse mbi 1,300 të tjerë janë në pritje për të marrë kompensim. Autoritetet britanike i kanë konfiskuar celularët e emigrantëve që mbërritën me gomone për të grumbulluar të dhëna inteligjente mbi trafikimin e njerëzve.
Kritikët e këtij vendimi e quajnë atë një “farsë”. Ish-zëvendësministri i Emigracionit, Robert Jenrick, tani pjesë e partisë pro-Brexit “Reforma”, ka premtuar se nëse partia e tij vjen në pushtet, do të ndalojë zbatimin e vendimeve të Gjykatave Evropiane. Vendimi i Gjykatës është shpallur pas një padie për politikat e emigracionit për të ardhurit gjatë periudhës prill–nëntor 2020, kur kalimet e emigrantëve me gomone shënuan një kulm në vitin 2022 me rreth 40,000 mbërritje.
Telefonat celularë u mbaheshin për periudha të gjata emigrantëve, ndonjëherë për mbi tre muaj, dhe nuk u ktheheshin. Sipas vendimit, emigrantët ishin të detyruar të dorëzonin telefonat e tyre dhe të ofronin kodet e aksesit, duke krijuar mundësi për mbledhjen e informacioneve personale që më pas futeshin në databazën e quajtur “Project Sunshine”.
Një zëdhënës i Home Office ka deklaruar se ky kompensim është rezultat i politikave të mëparshme të konservatorëve, të cilët tashmë nuk janë më në pushtet. Ndërkohë, qeveria britanike ka miratuar ligje që e bëjnë ligjore marrjen e telefonëve celularë dhe pajisjeve elektronike nga autoritetet e emigracionit. Venidmi ka ngjallur shqetësime dhe përplasje politike mbi qasjen e Britanisë ndaj emigracionit.
