Kryeministri Edi Rama reagoi publikisht për debatet dhe përplasjet e fundit brenda Partisë Socialiste, duke komentuar veçanërisht qëndrimet kritike të dy figurave brenda radhëve socialiste: Erion Braçes dhe Elisa Spiropalit. Gjatë një interviste me Nikoll Lesin, Rama u ndal fillimisht te Erion Braçe, për të cilin tha se ka shtuar së fundmi kritikat ndaj qeverisë dhe ka shprehur ambicie për drejtimin e Bashkisë së Tiranës. Kryeministri theksoi se deputeti ka qenë gjithmonë i njëjtë në qëndrimet e tij dhe se nuk sheh asgjë të pazakontë në reagimet e tij.
Rama sqaroi se, sipas tij, karakteri dhe qëndrimet e Braçes nuk përbëjnë risi: “Unë di që Braçja ka qenë dhe do mbetet ky që është. Nuk mendoj se ka një gjë të re, ai ashtu ka qenë, ashtu do të jetë dhe ashtu duhet të jetë. Ai është ekzaktësisht vetvetja. Nuk ka asgjë për t’u çuditur. Ashtu është ai. Kush përpiqet ta imitojë bën gabim.” Ky koment u dha në kontekstin e tensioneve të brendshme dhe reagimeve publike që kanë rritur vëmendjen rreth pozicioneve të disa anëtarëve të partisë.
Më tej, Rama u ndal te raporti me Elisa Spiropalin, pas debateve që zhvilluan në mbledhjet e grupit parlamentar socialist. Spiropali kishte reaguar publikisht pas paralajmërimeve për masa disiplinore, duke shprehur pakënaqësi dhe rezerva ndaj situatës në parti. Kryeministri trajtoi mundësinë e përjashtimit dhe minimizoi interpretimet ekstreme të deklaratave të brendshme, duke theksuar se nuk duhet marrë gjithçka literalisht dhe se të gjithë mund të gabojnë, veçanërisht ata që kanë dhënë kontribute.
Rama u shpreh për këtë çështje me fjalët: “Do përjashtohet Elisa? Kush thotë hajde këtu më vrit, e thotë ngaqë të do. Nuk duhen marrë literalisht këto gjëra. Janë krejt normale për sa kohë nuk prekin vijën e kuqe. Çdo njeri mund të gabojë. Kush ka dhënë kontribute mund të gabojë dhe herën e dytë. E treta pastaj e ndan…” Lajmi është publikuar nga Top Channel.
