Kombëtarja angleze e futbollit u përball me një ngjarje të papritur dhe të turpshme disa ditë para ndeshjes së parë në Kupën e Botës 2026, kur gjatë transferimit të pajisjeve logjistike nga baza stërvitore në West Palm Beach (Florida) drejt kampusit “Swope Soccer Village” në Kansas City (Missouri) u raportua një vjedhje masive. Sipas raportimeve, hajdutët morën pothuajse të gjithë materialin sportiv, duke përfshirë këpucët e personalizuara për lojtarët kryesorë dhe pothuajse të gjithë topat e stërvitjes; në çantat që mbetën u gjet vetëm një top.
Stafi i sigurisë së kombëtares dyshon se mund të jenë përfshirë shoferët e kompanisë që kishte marrë përsipër transportin e mallrave. Autoritetet lokale të Kansas City-t reaguan shpejt dhe arrestuan dy persona në lidhje me ngjarjen. Policia lokale tha se po heton një vjedhje të mundshme nga automjeti i ekipit, i cili mbërriti në Kansas City me pjesë të konsiderueshme të sendeve të humbura.
Federata Angleze e Futbollit (FA) po bashkëpunon ngushtë me autoritetet amerikane për të gjetur dhe rikuperuar materialet e humbura. Ndërkohë, menaxherët e logjistikës të ekipit janë vënë në garë me kohën: ata kontaktuan menjëherë markat kryesore sponsorizuese për të prodhuar dhe sjellë me urgjencë këpucë të reja dhe pajisje të tjera të nevojshme përpara fillimit të ndeshjeve zyrtare. Përgatitjet po bëhen me prioritet për të siguruar që lojtarët të kenë pajisjet e nevojshme për debutimin.
Kujtohet se Anglia bën pjesë në një grup të fortë dhe ka një kalendar të ngjeshur ndeshjesh në fazën e grupeve të Botërorit. Orari zyrtar i Anglisë në grup është: 17 Qershor — Angli vs Kroaci (në Dallas); 23 Qershor — Angli vs Ganë (në Boston); 27 Qershor — Angli vs Panamà (në Nju Jork).
Top Channel
