Sociologu dhe filozofi francez Edgar Morin, një nga figurat kryesore të mendimit bashkëkohor, ka ndërruar jetë në moshën 104-vjeçare. Autor i një vepre të pasur në sociologji, filozofi dhe antropologji, Morin la pas një trashëgimi intelektuale që ndikoi breza studiuesish dhe njihej veçanërisht për teorinë e kompleksitetit, me të cilën sfidoi ndarjet tradicionale ndërdisiplinore dhe promovoi një qasje multidisiplinare ndaj dijes.
I lindur në Paris më 8 korrik 1921 me emrin Edgar Nahoum, ai mori pseudonimin Morin gjatë angazhimit në Rezistencën franceze kundër pushtimit nazist. Rritur në një familje hebreje të sekularizuar, ai u afrua fillimisht ideve marksiste dhe u bë pjesë e Partisë Komuniste Franceze, por u distancua shpejt nga dogmat stalinizmit; u largua nga partia në fund të viteve 1940 dhe u përjashtua në 1951. Përvojën e analizoi më pas në librin “Autokritika” dhe trajtoi totalitarizmin komunist në vepra të tjera.
Gjatë viteve 1950 e 1960, Morin u përqendrua në studimin e kulturës masive, veçanërisht të kinemasë, dhe kundërshtoi hapur luftën koloniale franceze në Algjeri. Në të njëjtën periudhë ai udhëtoi në Amerikë, ku studioi kultura indigjene dhe shoqëritë e përziera etnikisht. Një kthesë vendimtare për formimin e tij intelektual ndodhi në vitin 1969 gjatë qëndrimit në Salk Institute for Biological Studies në Kaliforni, ku kontakti me zhvillimet e avancuara të gjenetikës e frymëzoi për të zhvilluar konceptin e kompleksitetit. Ky koncept u prezantua së pari në veprën “Paradigma e Humbur” dhe u zgjerua më pas në serinë gjashtëvëllimore “Metoda”.
Morin argumentonte se problemet filozofike dhe shoqërore të mëdha nuk mund të kuptohen përmes analizave të thjeshtuara; ai theksonte se njeriu është njëkohësisht racional dhe emocional, i mençur dhe i paarsyeshëm, dhe se çdo përpjekje për t’u reduktuar këto aspekte në një dimension të vetëm është e gabuar. Në dekadat e fundit ai i kushtoi vëmendje reformimit të arsimit, duke mbrojtur në “Koka e Formuar Mirë” idenë se shkolla duhet të ndihmojë lidhjen e njohurive dhe jo thjesht grumbullimin e informacionit të fragmentuar. Edhe në moshë të thyer, Morin vazhdoi të komentonte zhvillimet globale, paralajmëroi për rreziqet e individualizmit dhe përçarjeve shoqërore dhe i bëri thirrje publike krijimit të “oazeve të rezistencës” të bazuara në vëllazëri, solidaritet dhe humanizëm.
