Bordi i Transparencës ka publikuar çmimet e reja për karburantet në vend, të cilat do të hyjnë në fuqi sot në orën 13:30. Çmimi i naftës do të jetë 207 lekë për litër, duke shënuar një ulje nga 215 lekë, ndërsa benzina do të shitet me 174 lekë për litër, nga 178 lekë që ishte dje.
Në mbledhjen e datës 15 Prill 2026, Bordi vendosi që çmimi i shitjes me pakicë i gazoilit të standardit SSH EN 590 të jetë jo më shumë se 207 lekë/litër, ndërsa ai i shitjes me shumicë jo më shumë se 195 lekë/litër. Po ashtu, çmimi i benzinës me pakicë do të jetë deri në 174 lekë/litër, ndërsa me shumicë deri në 162 lekë/litër. Çmimet do të mbeten në fuqi deri në mbledhjen e ardhshme të bordit.
Bordi thekson se çdo operator i shitjes me shumicë dhe pakicë të nënprodukteve të naftës është i detyruar të zbatojë këtë vendim. Në rast të shkeljeve, do të vendoset pezullimi i aktivitetit të operatorëve përkatës.
Ministria e Ekonomisë dhe Inovacionit, së bashku me Ministrinë e Financave dhe Ministrinë e Infrastrukturës dhe Energjisë, janë angazhuar për mbrojtjen e interesave të konsumatorëve shqiptarë dhe për ruajtjen e parimeve të konkurrencës së ndershme në treg.
Referuar Aktit Normativ nr. 1, datë 3.4.2026, në rast se çmimi i shitjes me pakicë për gazoilin kalon 220 lekë/litër, apo për benzinën 200 lekë/litër, zbatohet niveli 80% i akcizës. Sipas metodologjisë për llogaritjen e çmimeve tavan, çmimet aktuale janë nën këto kufij dhe për këtë arsye, niveli i akcizës do të zbatohet në 100%.
