Bordi i Transparencës ka ndryshuar përsëri çmimet e karburanteve. Sipas njoftimit, çmimi i naftës (gazoil) do të shitet 203 lekë për litër, nga 206 lekë më parë, ndërsa benzina shkoi nga 181 lekë në 180 lekë për litër. Çmimet e caktuara nga Bordi hyjnë në fuqi sot, ora 11:30, dhe do të jenë të vlefshme deri në mbledhjen e ardhshme të bordit, ku do të pasqyrohen ndryshimet e çmimeve të shitjes.
Njoftimi i plotë përcakton çmimet maksimale të shitjes me pakicë dhe me shumicë: për nënproduktin gazoil të standardit SSH EN 590, çmimi i shitjes me pakicë të jetë jo më shumë se 203 lekë/litër, ndërsa çmimi i shitjes me shumicë jo më shumë se 191 lekë/litër. Për nënproduktin benzinë, çmimi i shitjes me pakicë të jetë jo më shumë se 180 lekë/litër, ndërsa çmimi i shitjes me shumicë jo më shumë se 168 lekë/litër. Saktësimi i datës në njoftim përmend se çmimet hyjnë në fuqi sot datë 29 ora 11.30 dhe do të mbeten në fuqi deri në mbledhjen e ardhshme të bordit.
Bordi tërheq vëmendjen e çdo operatori të shitjes me shumicë dhe pakicë të nënprodukteve të naftës për detyrimin e zbatimit të këtij vendimi. Në rast të shkeljeve të konstatuara nga operatorë të ndryshëm do të vendoset pezullimi i aktivitetit.
Ministria e Ekonomisë dhe Inovacionit së bashku me Ministrinë e Financave dhe Ministrinë e Infrastrukturës dhe Energjisë janë angazhuar të mbrojnë interesat e konsumatorëve shqiptarë dhe ruajtjen e parimeve të konkurrencës së ndershme në treg.
Në sqarim thuhet se, referuar Aktit Normativ nr. 1, datë 3.4.2026, në rast se çmimi i shitjes me pakicë për gazoilin është më i lartë se 220 lekë/litër, apo për benzinën më i lartë se 200 lekë/litër, zbatohet niveli 80% i akcizës. Bazuar në zbatimin e metodologjisë për llogaritjen e çmimeve tavan të shitjes me pakicë, çmimet aktuale janë nën kufirin e Aktit Normativ nr. 1, datë 3.4.2026, dhe për rrjedhojë niveli i akcizës do të zbatohet i plotë, 100%.
