Bordi i Transparencës në mbledhjen e radhës ka vendosur çmimet e reja për tregtimin e karburanteve, vendim që hyn në fuqi sot në orën 17:00. Sipas vendimit, nafta do të shitet me 193 lekë/litër, nga 190 që ishte më parë, ndërsa benzina do të shitet me 177 lekë/litër, nga 176 që ishte.
Njoftimi i plotë përcakton plafonet e çmimeve: çmimi i shitjes me pakicë i nënproduktit gazoil, i standardit SSH EN 590, të jetë jo më shumë se 205 lekë/litër, ndërsa çmimi i shitjes me shumicë të jetë jo më shumë se 193 lekë/litër. Për nënproduktin benzinë, çmimi i shitjes me pakicë të jetë jo më shumë se 189 lekë/litër, dhe çmimi i shitjes me shumicë jo më shumë se 177 lekë/litër.
Çmimet e caktuara nga Bordi do të jenë të vlefshme deri në mbledhjen e ardhshme të tij, ku do të pasqyrohen ndryshimet e çmimeve të shitjes. Bordi tërheq vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtij vendimi. Në rast të shkeljeve të konstatuara nga operatorë të ndryshëm do të vendoset pezullimi i aktivitetit.
Ministria e Ekonomisë dhe Inovacionit, së bashku me Ministrinë e Financave dhe Ministrinë e Infrastrukturës dhe Energjisë, janë angazhuar për mbrojtjen e interesave të konsumatorëve shqiptarë dhe për ruajtjen e parimeve të konkurrencës së ndershme në treg.
