Bojkoti i avokatëve në gjykata vazhdon, me avokatët që po braktisin gjyqet dhe për herë të parë edhe masat e sigurisë, ndërsa gazetarët vijojnë të paraqiten në procese si publik pasi u kërkohet të firmosin formularë që përmbajnë të dhëna personale. Gjyqi i fundit që dështoi u zhvillua ndaj Erion Veliajt.
Gjykata është ndarë në dy kampe: disa gjyqtarë refuzojnë të aplikojnë gjoba ndaj avokatëve, ndërsa të tjerë po i dënojnë financiarisht. Gjykata e Posaçme përshkallëzoi masën e gjobitjes në gjyqin Veliaj. Të gjithë avokatët e 11 të pandehurve që po bojkotojnë gjykimet pranë GJKKO u gjobitën me nga 50 mijë lekë; në seancën e mëparshme për të njëjtën mungesë ata ishin gjobitur me nga 10 mijë lekë.
Kreu i Dhomës Kombëtare të Avokatisë i bëri apel Inspektorit të Lartë të Drejtësisë (ILD) që të nisë verifikimet për ndërhyrjen e gjykatës në profesionin e avokatisë dhe medias, jo vetëm përmes rregullores, por edhe duke u shqyrtuar përmasat e gjobave që po vendosen.
Maksa Haxhia u shpreh se nuk do të tërhiqen, duke e lidhur qëndrimin me parimin bazë të funksionimit të gazetarisë dhe duke bërë një referencë historike: “Ne nuk tërhiqemi sepse kjo është në parimin bazë të funksionimit të gazetarisë. Po u shkel kjo, atëherë ta mbyllim avokatinë, të ikim fare. Në atë sistem e mbylli Enver Hoxha, tha: ‘S’dua avokta’ edhe mbaroi. Sot bota është përsosur me një klik, kërkon çfarë të duash. Ku ta gjej unë, të dal jashtë. Unë e kam agjendën në celular, kur caktojmë datat, ne me axhendë dhe kemi probleme.”
Prova e parë e mënyrës sesi gjykata do të veprojë ndaj mungesave të avokatëve për masat e sigurisë do të shihet në orët në vijim, kur para trupës gjyqësore do të dalë Greta Pepa, e arrestuar në rastet e call center-ave, e cila ka një foshnjë katër muajsh dhe ka përfunduar në polici së bashku me fëmijën.
