Unioni i Gjyqtarëve, Shoqata Kombëtare e Gjyqtarëve dhe Shoqata e Prokurorëve, në një deklaratë të përbashkët të siguruar nga gazetarja e Top Channel, Anila Hoxha, kërkojnë ekzekutimin e menjëhershëm të pagave të magjistratëve dhe kundërshtojnë mënyrën se si institucionet po justifikojnë bllokimin e tyre. Organizatat shpjegojnë se Gjykata Kushtetuese i la Kuvendit afat deri më 31 korrik 2026 për miratimin e ndryshimeve ligjore lidhur me pagat dhe se, pas përfundimit të këtij afati, KLGJ dhe KLP kanë marrë vendime për llogaritjen e pagave në përputhje me mekanizmin të përcaktuar nga Kushtetuesja (referuar vendimit nr. 15/2026 dhe paragrafin 110).
Sipas deklaratës, pas bllokimit të pagesave të përllogaritura sipas formulës së përcaktuar nga Gjykata Kushtetuese, Ministria e Financave ka kërkuar zyrtarisht që KLGJ dhe KLP t’i dërgojnë Drejtorisë së Thesarit urdhërpagesat e llogaritura sipas formulës së mëparshme. Ndërkohë, Ministria e Drejtësisë ka pranuar publikisht se formula e vjetër është shfuqizuar dhe se për plotësimin e këtij boshllëku duhet ndërhyrja e Kuvendit. Organizatat theksojnë kontradiktën: nëse formula e mëparshme është shfuqizuar, mbi çfarë baze ligjore kërkohet zbatimi i saj?
Unioni, Shoqata Kombëtare dhe Shoqata e Prokurorëve argumentojnë se pagat nuk mund të mbeten peng i miratimit të një ligji të ri dhe se mosveprimi i Kuvendit nuk mund të pezullonte efektet e një vendimi kushtetues. Ata theksojnë se vendimet e KLGJ-së dhe KLP-së, për sa kohë nuk janë goditur gjyqësisht, janë akte në fuqi dhe duhet të respektohen dhe ekzekutohen nga institucionet përgjegjëse. Po ashtu, vërehet se nisma e re ligjvënëse e depozituar nga dy deputetë nuk mund të përdoret për të justifikuar bllokimin e pagave.
Në përfundim organizatat kërkojnë: ekzekutimin e menjëhershëm të pagave pa i kushtëzuar me ligjet e reja; që Ministria e Financave të sqarojë bazën ligjore për kërkesën për zbatimin e formulës së shfuqizuar; respektimin e vendimit nr. 15/2026 dhe mekanizmit për periudhën pas 31 korrikut 2026; ekzekutimin e vendimeve të KLGJ dhe KLP; dhe që çdo ndryshim ligjor i ardhshëm të mos prodhojë një rezultat më të pafavorshëm se standardi i vendosur nga Gjykata Kushtetuese.
