Rusia synon të diskutojë çështjet territoriale me Ukrainën në bisedimet dy-ditore që nisin të martën në Gjenevë, sipas zëdhënësit të Kremlinit, Dmitry Peskov. Ai theksoi rëndësinë e përfshirjes së kryenegociatorit Vladimir Medinsky, i cili kishte marrë pjesë në bisedimet e mëparshme, por kishte munguar në negociatat në Abu Dhabi për arsye ushtarake.
Kremlini ka njoftuar se raundi i ri do të ketë një format të zgjeruar, duke përfshirë figura të rëndësishme si kreun e inteligjencës ushtarake, Igor Kostyukov, dhe zëvendësministrin e jashtëm, Mikhail Galuzin. Një nga pengesat kryesore në bisedime mbeten çështjet territoriale, pasi Moska shpreh pakënaqësi për refuzimin e Kievi për të hequr dorë nga territoret e pretenduara, si rajoni i Donetsk. Presidenti ukrainas, Volodymyr Zelensky, ka paralajmëruar se Rusia nuk duhet të presë asnjë “dhuratë” në negociata.
Galuzin, para fillimit të bisedimeve, u referua propozimit të Presidentit Putin për ta vendosur Ukrainën përkohësisht nën administrimin e Kombeve të Bashkuara, një ide që ishte refuzuar gjerësisht vitin e kaluar. Po ashtu, Kremlini njoftoi se në Gjenevë do të zhvillohen bisedime dypalëshe mes Shteteve të Bashkuara dhe Rusisë për çështje ekonomike. I dërguari special i Putinit, Kirill Dmitriev, është angazhuar në këto bisedime, duke kërkuar heqjen e sanksioneve ndaj Rusisë dhe rimëkëmbjen e marrëdhënieve ekonomike me SHBA-në në rast të një marrëveshjeje paqeje.
Rusia vazhdon të deklarojë se dëshiron të përfundojë luftën që ka zgjatur gati katër vjet, por vetëm sipas kushteve të saj, një kërkesë që Ukraina e konsideron të papranueshme. Bisedimet në Gjenevë përbëjnë një hap të rëndësishëm në përpjekjet për të zgjidhur konfliktin që ka prekur Ukrainën dhe marrëdhëniet ndërkombëtare.
