Drejtoria Vendore e Policisë Lezhë publikoi rezultatet e punës për muajin maj, duke raportuar 142 vepra penale të evidentuara dhe një nivel zbulueshmërie prej 93%. Të dhënat, të prezantuara në një konferencë për media, tregojnë se janë identifikuar 145 autorë të dyshuar, prej të cilëve 17 janë arrestuar ose ndaluar. Gjatë muajit janë kapur gjithashtu 6 persona në kërkim, janë trajtuar 338 konflikte dhe janë evidentuar 6 raste të dhunës në familje.
Policia njoftoi finalizimin e 6 operacioneve policore, të ndjekura me metoda speciale hetimi për periudha kohore të ndryshme. Këto përfshijnë dy operacione kundër veprimtarisë kriminale të organizimit të lotarive të palejuara; dy operacione për goditjen e kultivimit të bimëve narkotike; një operacion kundër shitjes dhe shpërndarjes së lëndëve narkotike në afërsi të shkollave dhe zonave përreth; dhe një operacion për goditjen e tregut informal të këmbimeve valutore, kryesisht ushtrimeve pa licencë.
Gjatë hetimeve dhe operacioneve, si provë materiale janë sekuestruar 5,548 fidanë dhe bimë narkotike kanabis sativa, rreth 1 kilogram lëndë narkotike kanabis sativa, dhe sasi të lëndës narkotike kokainë. Forcat e rendit sekuestruan dy automjete të trafikuara, të shpallura në kërkim ndërkombëtar, si dhe në total 9 automjete të përfshira në kryerjen e veprave penale. Në mesin e sendeve të sekuestruara janë një armë zjarri pistoletë dhe katër armë të ftohta (thika).
Po ashtu janë sekuestruar makineri për lojëra fati, letra bixhozi dhe tavolina pokeri, vlera monetare në forma të ndryshme: 65,000 euro, 6 milion lekë të rinj, 12,000 dollarë dhe 4,000 paund; si dhe lëndë drusore e prerë në mënyrë paligjshme dhe materiale të tjera që shërbejnë hetimeve.
Raporti i Drejtorisë Vendore të Policisë Lezhë për muajin maj përmbledh aktivitetet hetimore dhe operative të ndërmarra, me detaje mbi numrin e veprave penale, autorët e dyshuar, masat ndëshkuese dhe provat e sekuestruara. Top Channel.
