Presidenti i Konferencës Ndërkombëtare të Komisionerëve për të Drejtën e Informimit dhe Aksesin në Informacion (ICIC) dhe Komisioner për të Drejtën e Informimit dhe Mbrojtjen e të Dhënave Personale i Shqipërisë, Besnik Dervishi, mori pjesë në konferencën në Prishtinë që shënoi 15-vjetorin e Autoritetit për Mbrojtjen e të Dhënave Personale dhe 5-vjetorin e Agjencisë për Informim dhe Privatësi të Kosovës. Në fjalën e tij, Dervishi vlerësoi transformimin e Agjencisë së Kosovës në një institucion kyç për garantimin e së drejtës për informim dhe të drejtës për mbrojtjen e të dhënave personale.
Si President i ICIC, ai evidentoi rritjen e rolit të Kosovës në strukturat ndërkombëtare të transparencës, duke përmendur kontributin e Agjencisë në grupet e punës të ICIC, drejtimin e Grupit të Punës për Integritetin e Informacionit dhe përfaqësimin në Komitetin Ekzekutiv të Rrjetit Evropian për Transparencë dhe të Drejtën e Informimit. Dervishi vuri në dukje se rajoni po kalon nga pozicioni i vetëm marrës i standardeve ndërkombëtare në një pozicion që kontribuon në formësimin e tyre, dhe se kjo tregon besimin e komunitetit ndërkombëtar ndaj Agjencisë së Kosovës.
Ai shprehu vlerësime të veçanta për Komisioneren e Agjencisë për Informim dhe Privatësi, Krenare Sogojeva Dërmaku, dhe theksoi se bashkëpunimi ndërmjet autoriteteve homologe të Shqipërisë dhe Kosovës përbën një model partneriteti të bazuar në besim reciprok dhe shkëmbim përvojash në mbrojtje të të drejtave themelore.
Konferencën e përshëndeti Albulena Haxhiu, Ushtruese e Detyrës së Presidentit të Kosovës dhe Kryetare e Kuvendit, e cila theksoi se e drejta për t’u informuar është një shtyllë e demokracisë. Haxhiu nënvizoi se transparenca dhe privatësia janë garanci të pandashme: transparenca bën pushtetin të përgjegjshëm, ndërsa privatësia mbron qytetarin, dhe se roli i Agjencisë rritet për shkak të zhvillimeve teknologjike.
Komisionerja Sogojeva Dërmaku vlerësoi rrugëtimin pesëvjeçar të Agjencisë, përmendi përpjekjet për ndërgjegjësim publik, ngritje kapacitetesh dhe forcim të mekanizmave të mbikëqyrjes dhe zbatimit të legjislacionit, dhe falënderoi partnerët ndërkombëtarë, me përmendje të veçantë për Besnik Dervishin dhe institucionin homolog shqiptar. Zdravko Vukiç, Zëvendëskryetar i Bordit Evropian për Mbrojtjen e të Dhënave dhe Drejtor i Autoritetit Kroat, përgëzoi Agjencinë dhe vlerësoi statusin e vëzhguesit në EDPB si një hap të rëndësishëm drejt standardeve evropiane. Konferenca riafirmoi rëndësinë e bashkëpunimit rajonal dhe ndërkombëtar në promovimin e transparencës, të drejtës për informim dhe mbrojtjes së të dhënave personale.
