Kryetari i Partisë Demokratike, Sali Berisha, i bëri thirrje qytetarëve të bashkohen në protestën e paralajmëruar për nesër në orën 10:00 para Universitetit, në një videomesazh ku akuzoi qeverinë për dhunë ndaj studentëve dhe të rinjve. Ai pretendon se prej një jave Tirana po përjeton një “terror të kuq”, ndërsa sipas tij fëmijë, gjimnazistë dhe studentë janë dhunuar, ndaluar dhe arrestuar në masë, duke mbushur paraburgimet e vendit. Berisha deklaroi se mbi 2,000 të rinj janë trajtuar në mënyrë të egër dhe se reagimet e forcave të rendit kanë qenë disproporcionale, me përdorim të shkopinjve të gomës, gazit helmues e plumbave gome që, sipas tij, kanë shkaktuar dëmtime serioze te studentët, gazetarët dhe qytetarët.
Në videomesazh ai akuzoi kryeministrin Edi Rama për krijimin e një “platforme kriminale të terrorit të kuq”, që përfshin, sipas tij, mercenarë të paguar dhe “vrasës serialë” të importuar, dhe përdorim të mjeteve teknologjike të terrorit. Berisha tha se protesta e asistentëve, pedagogëve dhe profesorëve në mbështetje të studentëve e ka përmbysur këtë platformë, dhe e përshkroi situatën si fundin e “Edvin Kristaq Xhelatit”. Ai akuzoi Ramën për 13 vite vjedhje të fondeve dhe pasurive publike, arrogancë, përçmim, lidhje me krimin dhe drogën, bllokim të rotacionit politik dhe farsë elektorale.
Berisha theksoi se studentët dhe të rinjtë “u ngritën si feniksi nga hiri” dhe po bëjnë detyrën e tyre, dhe për këtë arsye i kërkoi shumicës së heshtur të shqiptarëve — të gjitha bindjeve politike dhe të paparti — të pushojnë frikën dhe të dalin në shesh në mbështetje të tyre. Ai shtoi se çdo ditë pa dorëheqjen e Ramës i kushton më shumë vendit dhe se mosbashkimi me studentët zgjat “fundin e tij të pashmangshëm”. Berisha ftoi qytetarët të qëndrojnë me të rinjtë deri në fitore, duke përsëritur thirrjen për tubim nesër në ora 10:00 para universitetit. (Top Channel)
