Sali Berisha, kreu i Partisë Demokratike, njoftoi se ka nisur mbledhjen e firmave për një referendum mbi Hartën e re Territoriale, e cila, sipas tij, u miratua mbrëmë në një parlament që ai e quan “organizatë kriminale”. “Ne kemi nisur mbledhjen e firmave për referendum. Do të studiojmë modalitetet e referendumeve lokale dhe kombëtare, për të mbrojtur interesat e qytetarëve shqiptarë nga një bandë, organizatë kriminale që quhet parlament,” deklaroi Berisha para gazetarëve.
Ai akuzoi deputetët e mazhorancës se, me votimin pas mesnatës, kanë cenuar interesat e qytetarëve të 15 bashkive. Berisha e përshkroi votimin si një akt kundër qytetarëve dhe pretendoi se deputetët kanë vepruar nën ndikimin e korrupsionit dhe interesave personale. Sipas tij, veprimi i deputetëve përbën “një krim kolektiv” me qëllim “asgjesimin” e 15 bashkive dhe se ata kanë votuar të udhëhequr nga interesa private të lidhura me korrupsionin, vjedhjet dhe plaçkën e siguruar me mandat.
Berisha theksoi rëndësinë e reformës territoriale, duke e cilësuar atë si një nga reformat më të rëndësishme për qytetarët dhe komunitetet, pasi lidhet me qeverisjen vendore, zhvillimin e territorit, ruajtjen e trashëgimisë kulturore e historike dhe mbrojtjen e identitetit të komuniteteve. Ai nënvizoi rolin kyç të njësive të qeverisjes vendore në zhvillimin ekonomik dhe në tërheqjen e investimeve në zonat ku jetojnë qytetarët.
Në reagimin e tij të ashpër, Berisha përdori formulime të forta, duke e quajtur aktin “flagrant antikombëtar, antiqytetar” dhe akuzoi deputetët e mazhorancës si “parti e krimit” që “shkelmuan interesat e zgjedhësve të tyre”. Ai përsëriti se reforma preket drejtpërdrejt vetë qeverisjen e komuniteteve dhe se për këtë arsye është thelbësore për qytetarët dhe komunitetet. (Top Channel)
