Kreu i Partisë Demokratike, Sali Berisha, mbajti në Strasburg një fjalim në Asamblenë Parlamentare të Këshillit të Europës, ku akuzoi qeverinë shqiptare për kufizimin e pluralizmit dhe për kontroll të gjerë mbi median dhe gjuhën publike. Ai e përshkroi fenomenin si “korruptim të gjuhës”, një mjet të pushtetit që transformon pluralizmin politik në një fiktivitet dhe e quajti këtë ndikim “burg pa mure”.
Berisha deklaroi se mbi 90% e mediave në Shqipëri kontrollohen, sipas tij, nga kryeministri, “narkoqeveria” dhe bizneset e oligarkëve të tij. Më pak se 10% e mediave që nuk janë nën këtë kontroll, tha ai, janë subjekt i persekutimit: sulme verbale dhe fizike ndaj gazetarëve nga vetë kryeministri dhe zyrtarë të lidhur me të, gjoba të rënda, madje edhe shkatërrim të pronës dhe pasurisë së tyre. Ai shtoi se të gjitha rekomandimet e këtij institucioni dhe të institucioneve të tjera ndërkombëtare për mediat në Shqipëri janë injoruar nga qeveria.
Në fjalimin e tij Berisha argumentoi se, kur kontrolli i mediave arrin nivele të tilla, “e keqja banale” nuk mbetet një seri gabimesh rastësore, por shndërrohet në një sistem operativ; korruptimi i gjuhës kthehet në një “teknologji sundimi” që parandalon lindjen e mendimit të pavarur. Ai tha se korruptimi i gjuhës shkatërron kontratën themelore mes individit, shoqërisë dhe së vërtetës, duke korruptuar mendimin, duke bërë lirinë fiktive dhe duke zëvendësuar pluralizmin politik me një pluralizëm burokratik.
Berisha citoi shprehjen të Ludwig Wittgenstein: “Kufijtë e gjuhës sime tregojnë kufijtë e botës sime,” për të theksuar rolin përcaktues të gjuhës në jetën publike. Ai akuzoi gjithashtu përdorimin e gjuhës për të sulmuar kundërshtarët dhe për të demonizuar opozitën, duke bërë opozitën përgjegjëse për gjithçka që ndodh në vend. Si kusht për rivendosjen e pluralizmit dhe pavarësinë e mediave, Berisha kërkoi qëndrime të prera, sanksione ndërkombëtare dhe ndëshkimin e, siç e quajti ai, “narkoshtetit” në Shqipëri dhe të atyre që e ndërtuan atë. Përmbajtja e fjalimit u transmetua nga Top Channel.
