Gazeta më e madhe gjermane “Bild” ka pasqyruar samitin e BE-së që u zhvillua dje në Tiranë, por edhe sulmin ndaj liderit të opozitës, Sali Berisha në bulevard gjatë protestës. Gazetari Peter Tiede shkruan se “vendi në Ballkan (Shqipëria) që dëshiron të anëtarësohet në BE konsiderohet një shtet mafioz dhe droge dhe është në kaos”.
“Samiti i djeshëm i Ballkanit Perëndimor në kryeqytetin shqiptar të Tiranës trajtoi anëtarësimin në BE të shteteve si Shqipëria, Kosova, Maqedonia e Veriut dhe Serbia. I pranishëm ishte gjithashtu: Kancelari Olaf Scholz.
Kreu i opozitës shqiptare Sali Berisha (78, Partia Demokratike) drejtoi një demonstratë. Papritur, Presidenti i parë i Shqipërisë i zgjedhur lirisht u sulmua nga një bandit dhe u godit në fytyrë. Menjëherë truprojat i janë drejtuar sulmuesit duke e rrahur. Berisha ishte dukshëm i befasuar nga sulmi”.
Demonstrata, tha Berisha për BILD vonë në mbrëmje, ishte e drejtuar kundër qeverisë së kryeministrit Edi Rama dhe bëri thirrje për një perspektivë të vërtetë dhe të ndershme evropiane për Shqipërinë.
“Nuk ishte vetëm një sulm ndaj meje, por ndaj gjithë opozitës në Shqipëri. Vështirë se mund të jetë rastësi që të dërgohet një bandit kundër meje ndërsa kancelari gjerman po takohej me kreun e qeverisë sonë mafioze në Tiranë. Është koha që BE të kuptojë se sa i rrezikshëm është Edi Rama” tha ai.
Berisha më herët pretendonte se sulmuesi ishte një informator i njohur i policisë kriminale.“Për vite me radhë, Berisha dhe socialisti Rama janë grindur. Në Shqipëri vazhdojnë protestat e dhunshme.
Berisha dhe Rama vazhdojnë të akuzojnë njëri-tjetrin për korrupsion. Berisha e konsideron Ramën përgjegjës, ndër të tjera, për faktin se Shqipëria konsiderohet tashmë një nga qendrat më të rëndësishme të trafikut të drogës në Evropë.
Përveç kësaj, Berisha akuzon Ramën se socialistët blejnë vota në zgjedhje me ndihmën e mafies. Rama, i cili ishte në kontakt të ngushtë edhe me deputetë të rinj të CDU-së në Gjermani, e mohon këtë.
Pas një disfate elektorale nga socialistët e Ramës, Berisha dha dorëheqjen nga drejtimi i partisë. Në maj të këtij viti ai u rikthye në kryesinë e partisë pasi rrëzoi pasardhësin e tij dhe studentin politik Lulzim Basha. Basha u konsiderua shumë pro-qeveritar nga Berisha dhe demokratë të tjerë me ndikim.
Organizata për Siguri dhe Bashkëpunim në Evropë (OSBE) vërteton vazhdimisht se Shqipëria ka deficite serioze në zgjedhje, luftë kundër korrupsionit dhe demokratizim.
Ekspertët kryesorë të Ballkanit, si shefi i politikës së jashtme për një kohë të gjatë të Parlamentit të BE-së, Elmar Brok kanë paralajmëruar prej vitesh kundër bërjes së Shqipërisë dhe vendeve ballkanike të strukturuara në mënyrë të ngjashme anëtarë të plotë të BE-së” mbyllet shkrimi.
