Kryetarja e Komisionit Europian, Ursula von der Leyen, dhe presidenti i Këshillit Europian, António Costa, e cilësuan si “shokuese” paraqitjen në funeralin e Ratko Mlladiçit, ku i dënuari për krime lufte u përcoll me nderime ushtarake. Të dy udhëheqësit e institucioneve kryesore të Bashkimit Europian dënuan fuqishëm praninë e zyrtarëve të lartë serbë dhe glorifikimin e Mlladiçit, duke paralajmëruar se kjo rrënon perspektivën e anëtarësimit të Serbisë në BE. Në komunikimin e tyre në platformën X, ata kujtuan se Mlladiç ishte i dënuar për genocid, krime lufte dhe krime kundër njerëzimit.
Trupi i 84-vjeçarit, që vdiq në Hagë ndërsa vuante dënimin me burgim të përjetshëm, u transportua me avion shtetëror në Beograd. Aty u nderua me gardë nderi nga ushtria serbe dhe forca të tjera të sigurisë, ndërsa televizioni shtetëror dhe Kisha Ortodokse Serbe morën pjesë; arkivoli qëndroi i mbështjellë me flamurin serb. Një deklaratë e mëparshme e zëdhënëse së Komisionit, Paula Pinho, sipas të cilës “kishim dëgjuar se ishte parashikuar një funeral me nderime shtetërore dhe kjo nuk ka ndodhur”, shkaktoi reagime të forta publike. Ministrja e Jashtme e Bosnje e Hercegovinës e quajti deklaratën turp për BE-në, duke theksuar se në rreshtin e parë të funeralit ishin pesë ministra të qeverisë serbe, i ishte bërë nder ushtarak një krimineli të dënuar dhe trupi ishte transferuar me avion qeveritar.
Deklarata e përbashkët e von der Leyen dhe Costës konsolidon dënimin institucional të BE-së ndaj lartësimit të figurës së Mlladiçit dhe thekson se dështimi i Serbisë për t’u përballur me këtë kapitull të historisë bie ndesh me vlerat e pranimit në Bashkimin Europian. Si pasojë, komisionerja për Zgjerimin, Marta Kos, anuloi vizitën e planifikuar në Serbi. Në plan politik të brendshëm, presidenti Aleksandar Vučiç ka bërë thirrje për zgjedhje të parakohshme parlamentare në fund të tetorit. Qeveria serbe i ka propozuar shpërndarjen e Parlamentit dhe mbajtjen e zgjedhjeve të parakohshme, të cilat, nëse miratohen, duhet të shpallen brenda 72 orësh; mediat e huaja raportojnë se Vuçiç mund të përgatitet të kalojë nga presidenca në detyrën e kryeministrit.
Burimi: Top Channel.
