Komisionarja evropiane për Zgjerim, Marta Kos, tha se nuk ka një vendim formal për ngrirjen e fondeve për Serbinë, por konfirmoi se nga miratimi i ligjeve për drejtësinë nuk janë kryer pagesa nga Plani i Rritjes. Në deklarimin e saj në Bruksel, Kos sqaroi se nuk ka thënë kurrë se fondet janë ngrirë dhe se procesi aktual është verifikim i vazhdueshëm për të parë nëse vendet përfitues përmbushin kriteret. Ajo pranoi se që nga miratimi i ligjeve për drejtësinë para disa muajsh nuk është bërë asnjë pagesë, por shtoi se nuk është marrë ndonjë vendim formal për mosdhënie të fondeve.
Më 30 prill, Kos kishte thënë se Komisioni Evropian ishte ndalur nga pagesa e mjeteve për shkak të ligjeve kontestuese për drejtësinë, duke argumentuar se Serbia kishte shënuar prapakthim në këtë fushë dhe se mbështetja financiare të pezullohej derisa të korrigjoheshin problemet. Ligjet kontestuese, të njohura si “ligjet e Mërdiqit”, të miratuara në janar, sipas BE-së përbëjnë një hap prapa në integrimin e Serbisë dhe kufizojnë pavarësinë e gjyqësorit.
Kos pohoi se nëse Komisioni Evropian vlerëson se Serbia ka përmbushur kriteret për pagesë, atëherë do t’i jepen edhe fondet e planifikuara. Ajo rikujtoi se statusi i vendit kandidat sjell detyrime për të dyja palët dhe se pritet përparim, jo prapakthim në fusha të caktuara.
Nga Plani i Rritjes për Serbinë janë parashikuar 1.588 miliard euro për periudhën 2024–2027, një përzierje grantesh dhe kredish për mbështetjen e reformave. Pagesat bëhen dy herë në vit, bazuar në përparimin e arritur. Në janar, Serbia mori pak më shumë se gjysmën e fondeve të parashikuara në këstin e parë, duke marrë 61.1 milionë euro nga 112 milionë të planifikuara, pasi kishte përmbushur vetëm tre nga shtatë reformat e parashikuara. Me fondet e parafinancimit—7% e shumës totale të ndarë—shuma që Serbia ka marrë deri tani është 167.59 milionë euro.
Plani i Rritjes për Ballkanin Perëndimor, i miratuar në fund të vitit 2023, synon përshpejtimin e afrimit ekonomik të rajonit me BE-në dhe ndarja e përfitimeve të tregut të përbashkët para anëtarësimit; institucioneve evropiane u janë alokuar gjithsej gjashtë miliardë euro për periudhën 2024–2027.
