Bashkimi Europian nuk ka komentuar drejtpërdrejt dosjen e Vlora Hysenit, por Komisioni Europian ka përcjellë një mesazh të qartë mbështetjeje për institucionin që po kryen hetimet. Zëdhënësi i Komisionit për zgjerimin, Guillaume Mercier, theksoi se Brukseli nuk komenton çështjet që janë ende në proces, duke shtuar se “ne i ndjekim nga afër zhvillimet që lidhen me shtetin e së drejtës, veçanërisht reformat në drejtësi dhe luftën kundër krimit të organizuar dhe korrupsionit, fusha në të cilat Shqipëria ka bërë përparim të konsiderueshëm”.
Mercier shprehu gjithashtu mbështetjen e qartë për Strukturën e Posaçme Kundër Korrupsionit dhe Krimit të Organizuar (SPAK): “Kemi besim të plotë tek aftësia e Strukturës së Posaçme Kundër Korrupsionit dhe Krimit të Organizuar, e njohur si SPAK, për të zbuluar, hetuar dhe ndjekur penalisht krimin e organizuar”. Ai theksoi se Brukseli nuk merr qëndrim mbi fajësinë apo pafajësinë e individëve të përfshirë dhe nuk komenton provat e dosjes së Hysenit.
Zëdhënësi bëri të ditur gjithashtu se kontaktet mes institucioneve të BE-së dhe autoriteteve shqiptare vazhdojnë: “Në një këndvështrim më të gjerë, ne jemi gjithmonë në kontakt me homologët shqiptarë”. Për një vlerësim më të gjerë të situatës në Shqipëri, Mercier iu referua raportit të zgjerimit që do të publikohet në javët në vijim.
Në planin institucional, qëndrimi i Brukselit është i qartë: nuk ka koment për çështjen konkrete dhe nuk paragjykohet procesi, por ekziston besim i deklaruar te SPAK për vijimin dhe përfundimin e hetimit. Ndërkohë, në Tiranë dosja e ish-drejtoreshës së SHISH është bërë një përplasje e fortë politike, por Komisioni shmangu një qëndrim mbi detajet e çështjes, duke ruajtur linjën e moskomentimit për raste në proces dhe duke theksuar mbështetjen ndaj institucioneve të drejtësisë që po e ndjekin atë.
