Bashkimi Europian vazhdon të mbetet i vendosur për procesin e zgjerimit me gjashtë vendet e Ballkanit Perëndimor, ku sipas zyrtarëve më të lartë të unionit kryesojnë Shqipëria dhe Mali i Zi. Komisionerja për Zgjerim e BE-së, Marta Kos, zhvilloi takime të nivelit të lartë në Greqi, prej nga mori garanci për mbështetjen e këtij procesi.
Gjatë qëndrimit në Athinë, Kos u takua me Kryeministrin Kyriakos Mitsotakis, me të cilin diskutoi zhvillimet e fundit pozitive në Mal të Zi dhe Shqipëri, si dhe çështje lidhur me Ukrainën dhe Moldavinë dhe rrugën e zgjerimit drejt Bashkimit Europian për Ballkanin Perëndimor. Komisionerja theksoi rëndësinë e rolit të Greqisë si partner që kufizohet me disa vende kandidate dhe theksoi bashkëpunimin në këtë proces.
Angazhimin e Greqisë për integrimin e rajonit e konfirmoi edhe ministri i Jashtëm, Giorgos Gerapetritis, i cili gjatë takimit me Komisioneren Kos theksoi përfshirjen aktive të qeverisë greke në procesin e zgjerimit. Ai bëri të ditur se “Qeveria greke është shumë e angazhuar në procesin e zgjerimit, veçanërisht në Ballkanin Perëndimor, dhe do të luajë një rol vendimtar në nxitjen e progresit gjatë Presidencës së saj të Këshillit në një moment të rëndësishëm vitin e ardhshëm”.
Në fokus të bisedimeve mes Komisioneres dhe zyrtarëve grekë ishin edhe marrëdhëniet me Turqinë dhe me të gjitha shtetet anëtare të Bashkimit Europian, me vëmendje të veçantë ndaj Qipros. Takimet vendosën theksin në nevojën për mbështetje dhe koordinim të brendshëm të BE-së për të avancuar agjendën e zgjerimit dhe për të përshpejtuar proceset e integrimit ku ka zhvillime pozitive.
Përmes këtyre takimeve, institucionet e BE-së dhe autoritetet greke riafirmuan angazhimin e tyre për të punuar së bashku në mbështetje të kandidaturave dhe progresit reformues në vendet e Ballkanit Perëndimor, ndërsa diskutuam edhe çështje dypalëshe dhe rajonale që ndikojnë në procesin e zgjerimit.
