Hetimi i Prokurorisë së Milanos për një rrjet të paligjshëm baste ka hyrë në një fazë të re, teksa disa futbollistë të njohur janë dorëzuar me kërkesa për “obligim”, duke shpresuar të shmangin ndjekjen penale me një gjobë prej 250 eurosh. Këto kërkesa, sipas agjencisë Ansa, janë parashtruar nga Samuele Ricci, Raoul Bellanova dhe Mattia Perin.
Prokurorët pritet t’i miratojnë këto kërkesa, duke mbyllur kështu procedurat për këta futbollistë në këmbim të një pagesë simbolike. Hetimi, i udhëhequr nga Guardia di Finanza dhe në koordinim me prokurorët Roberta Amadeo dhe Paolo Filippini, ka identifikuar gjithsej 13 futbollistë të përfshirë në baste ilegale, veçanërisht në poker online dhe në ngjarje sportive jashtë futbollit. Emra të njohur si Nicolò Fagioli, Nicolò Zaniolo, Sandro Tonali dhe Alessandro Florenzi janë gjithashtu përfshirë në këtë proces.
Shumica e futbollistëve akuzohen për pjesëmarrje në baste të paligjshme, ndërsa Fagioli dhe Tonali, të cilët ishin të përfshirë në një hetim të mëparshëm, akuzohen gjithashtu për promovimin e platformave të paligjshme. Për dy të fundit, opsioni i “obligimit” nuk është i disponueshëm, dhe ata pritet të kërkojnë marrëveshje për pranimin e fajësisë.
Po ashtu, edhe sportistë të tjerë nga disiplina të ndryshme, si tenisti Matteo Gigante, pritet të përfitojnë nga mundësia për të paguar gjobën dhe për të mbyllur rastin ndaj tyre. Fokusi kryesor i hetimit mbetet mbi dy menaxherë të dyshuar, Tommaso De Giacomo dhe Patrik Frizzera, si dhe mbi tre persona të tjerë, të cilët, përmes një dyqani bizhuterish, dyshohet se kanë falsifikuar shitje të orëve luksoze për të mbuluar borxhet e lojtarëve nga bastet.
Një seancë dëgjimore për pranimin e fajësisë për këta pesë persona është parashikuar për 26 nëntor. Hetimi ka ngritur pyetje të shumta mbi ndikimin e basteve ilegale në botën e sportit dhe vazhdon të ketë një ndikim të rëndësishëm në skenën sportive italiane.
