Duket se në Partinë Demokratike zyrtare ka nisur një “luftë e ftohtë” mes mbështetësve të Lulzim Bashës, i cili kërkon të marrë sërish drejtimin e partisë dhe të pjesës tjetër, shumica deputetë të PD-së.
Sekretari i Përgjithshëm i PD-së Gazment Bardhi, ka mbledhur sot grupin parlamentar, për të kundërshtuar atë pjesë të Kryesisë të cilët kërkojnë nisjen e procesit zgjedhor për kreun e partisë, pa mbledhur Këshillin Kombëtar. Në një prononcim për mediat, Bardhi deklaroi i prerë se nuk do të firmosë asnjë vendim që mbi ndesh me statutin. Ai tha se PD ka institucione dhe të gjithë ata që duan bashkëjetesën brenda kësaj force politike, duhet të zbatojnë me përpikmëri statutin.
“Nuk do të firmos asnjë vendim që bie ndesh me statutin e PD. Unë nuk do të jap detaje të zbatimit të statutit. Nuk jam vënë në dijeni për një vendim të tillë. Mesa duket kanë vendosur të ushtrojnë kompetencat e sekretarit të përgjithshëm një grup i caktuar. Janë në të drejtën e tyre, ashtu siç sekretari i përgjithshëm është në të drejtën e tij për të zbatuar me përpikmëri statutin.
Është e qartë, statute i PD, ky debat ka një vit e gjysmë që diskutohet. Komisioni zgjedhor i partisë emërohet nga Këshilli Kombëtar. Përgjigja ime e vetme është se sekretari i përgjithshëm i PD është i vendosur të zbatojë statutin. Pa statut dhe rregulla nuk mund të ketë bashkëjetesë. Unë e kam zbatuar vendimin e kryesisë, e përsëris, unë respektoj çdo detyrim statutor.
I vetmi dokument apo set rregullash që n amban bashkë në PD është statute i PD. Unë këtë po bëj. Unë jam për të ofruar zgjidhje dhe për të gjetur zgjidhje. PD ka institucione, nëse një parti politike nuk ka organin më të lartë vendimmarrës që drejton partinë mes dy kuvendeve, nuk mund të organizojë proces zgjedhor”, u shpreh Bardhi.
Lidhur me vendimin për shkarkimin e Saimir Korreshit nga posti i kreut të PD-së së degës së Lushnjës, Bardhi tha se nuk ka asnjë informacion se si është zëvendësuar deputeti demokrat.
“Unë nuk di pse është zëvendësuar njëri apo tjetri, nuk kam firmosur asnjë vendim dhe nuk do firmos asnjë vendim që bie ndesh me statutin. Unë nuk do të jap detaje të zbatimit të statutit. Nuk kam dijeni për një propozim të tillë. Organizimi i PD-së është përgjegjësi e sekretarit të përgjithshëm. Mesa duket një grup kanë vendosur të ushtrojnë kompetencat e sekretarit të Përgjithshëm. Unë do të zbatoj statutin e PD-së. Çdokush tjetër që ka vendosur të ecë përpara në procese anti statutore bën zgjedhjet e tij. Pa statut dhe pa rregulla nuk mund të ketë bashkëjetesë”, u shpreh Bardhi.
