Barcelona po shqyrton përforcime në merkaton e janarit, me drejtimin e klubit që e ka bërë prioritet repartin e mbrojtjes. Drejtori sportiv Deco preferon afrimin e një qendërmbrojtësi, idealisht më këmbën e majtë, me eksperiencë dhe cilësi të provuara, por nuk përjashtohet edhe opsioni i një mbrojtësi krahut në rast se shfaqet një alternativë interesante dhe e përballueshme financiarisht.
Në listën e kandidatëve janë tre emra: Alessandro Bastoni i Interit, Nico Schlotterbeck i Borussia Dortmundit dhe Lisandro Martinez i Manchester United. Bastoni, 28 vjeç, konsiderohet një nga dëshirat kryesore të Deco-s; ai ishte tentuar edhe gjatë merkatos së verës. Raportohet se mes klubit dhe futbollistit kishte pasur dakordësi për një kontratë deri në 2031, por transferimi nuk u konkretizua pasi trajneri Hansi Flick nuk e miratoi lëvizjen. Bastoni mbetet i hapur për një transferim te Barcelona dhe çmimi i tij mund të luhatet rreth 40 milionë euro, pasi kontrata me Interin skadon pas rreth një viti e gjysmë.
Schlotterbeck, 26-vjeçar nga Borussia Dortmund, përshtatet mirë me filozofinë e Flick dhe është i njohur për trajnerin, i cili e ka debutuar atë edhe në përfaqësuesen e Gjermanisë. Ai mund të luajë si qendërmbrojtës dhe edhe në krahun e majtë, duke ofruar alternativa taktike. Kostoja paraqet pengesë: pas rinovimit të kontratës sezonin e kaluar, dhe pavarësisht së ekziston një klauzolë largimi, vlera e transferimit mund të arrijë rreth 60 milionë euro.
Alternativa më ekonomike mund të jetë Lisandro Martinez, 28-vjeçar i Manchester United. Ai ka kontratë deri në 2027, me mundësi zgjatjeje për një sezon tjetër, dhe raportohet se marrëdhënia me klubin nuk është në nivelin më të mirë, ndërsa ai do të ishte i gatshëm të dëgjonte një ofertë nga Barcelona. Martinez përputhet me kërkesat si mbrojtës më këmbën e majtë dhe me përvojë në nivele të larta.
Emra të tjerë, si Lukeba i Leipzigut dhe Natan i Betisit, kanë humbur terren në listën e dëshirave. Deco po shqyrton disa alternativa për të forcuar prapavijën, veçanërisht pas dëmtimeve në nisje të sezonit, ndërsa vendimi përfundimtar do të ndikojë nga faktorët financiarë.
