Deputeti i Partisë Demokratike, Klevis Balliu, foli për lëndimet që mori gjatë protestës opozitare para Kryeministrisë të premten, duke përshkruar ndërhyrjen e forcave të rendit si të dhunshme dhe të qëllimshme për të frenuar protestën. Në emisionin “Top Story” ai tha se është goditur disa herë me shkop gome dhe është përdorur sprej kundër protestuesve, ndërsa sipas tij qeveria ka synuar “të vriste” protestën për shkak të impaktit të saj të gjerë mediatik.
Balliu theksoi se merret me protesta që nga 2019 dhe se njeh mirë efektivët e policisë, duke thënë se zakonisht organizatorët dhe policia kanë qënë të kujdesshëm. Në rastin konkret, megjithatë, sipas tij kishte një plan për të përdorur dhunë ndaj protestuesve, pasi protesta u shndërrua në problem për pushtetin për shkak të jehonës mediatike. Ai akuzoi se njerëzit që përdorën dhunën janë efektivë me probleme personale dhe janë të përfshirë në grupe të strukturuara kriminale.
Deputeti vuri në dukje se qeveria ndjen presion jo vetëm brenda vendit, por edhe në arenën ndërkombëtare, duke lidhur këtë me çështjen e pastrimit të parave të drogës që prekin edhe sektorin e ndërtimit. Përsa i përket asaj se si ndodhën lëndimet, Balliu përshkroi një sekuencë ngjarjesh: fillimisht u godit disa herë me shkop gome pranë Kryeministrisë; më pas pati një incident tjetër ku u përfshinë Aulon Kala dhe Luçiano Boçi; më vonë, te ura, u krijua debat me policinë për shkak se po tërhiqej me zvarrë një protestues; dhe goditja më e fortë u regjistrua pranë Parlamentit, kur u përdor një lloj spraji më i rëndë që sipas tij shkaktonte vështirësi në frymëmarrje dhe gjendje shoku, duke prekur edhe persona të moshuar.
Në deklarim, Balliu përsëriti bindjen se veprimet e ndërmarra synonin ta dobësonin protestën dhe theksoi shqetësimin për ndikimet e këtyre ndërhyrjeve.
