Shtetet e Bashkuara i kanë dorëzuar Izraelit avionin e parë të furnizimit me karburant KC-46, nga të paktën gjashtë të planifikuar. Forca Ajrore Izraelite (IDF) njoftoi se avioni do të quhet “Gideon” dhe pritet të hyjë menjëherë në shërbim pasi të përfundojnë disa rregullime teknike të vogla. Dorëzimi konsiderohet i rëndësishëm për operacionet izraelite në Lindjen e Mesme dhe shihet si hap kyç për rritjen e pavarësisë ushtarake të vendit dhe aftësisë për të ndërmarrë operacione të gjata edhe pa mbështetje direkte nga një administratë e ardhshme amerikane.
Sipas IDF-së, KC-46 rrit ndjeshëm aftësitë operacionale të Izraelit, duke i dhënë forcës ajrore më shumë liri për misione në distanca të gjata dhe për goditje të objektivave në gjithë Lindjen e Mesme, përfshirë Iranin dhe grupet Huthi në Jemen. Avioni mund të mbajë deri në 15% më shumë karburant dhe ka pothuajse dyfishin e kapacitetit të furnizimit me karburant në ajër krahasuar me avionin paraardhës “Raam”. Një zyrtar izraelit tha se nëse KC-46 do të ishte përdorur gjatë konfliktit të fundit me Iranin, ai do të kishte rritur ndjeshëm aftësitë e furnizimit me karburant të avionëve luftarakë izraelitë.
KC-46 është projektuar për të mbështetur avionët F-35, F-16 dhe F-15 të Izraelit dhe mund të furnizojë me karburant rreth 12 avionë në një fluturim. Ai mund të qëndrojë në ajër deri në 16 orë pa ndërprerje dhe deri në 24 orë me furnizim të ndërmjetëm. Përveç rolit të furnizimit me karburant, avioni ka funksione logjistike dhe mjekësore: mund të transportojë rreth 110 ushtarë dhe të mbështesë deri në 22 raste shpëtimi mjekësor. Është i pajisur me sisteme moderne navigimi, kabinë me shikueshmëri të avancuar dhe ambiente funksionale si kuzhinë, furrë, banjo dhe sistem kontrolli temperature.
Gjatë ceremonisë në bazën ajrore Nevatim, Shefi i Shtabit të Përgjithshëm, gjeneralmajor Eyal Zamir, deklaroi se “struktura e regjimit të Ajatollahut ka treguar çarje të dukshme. Shumica e aftësive të tij ushtarake janë shkatërruar, programi bërthamor është vonuar për vite dhe ekonomia e tij po shembet.”
