ARGJENTINË- Ish-ylli i “One Direction” ka ndërruar jetë nga hemorragjia e jashtme dhe e brendshme pas rënies nga ballkoni i katit të tretë të hotelit ku po qëndronte. Autopsia tregoi se lëndimet në kokë që pësoi ylli i popit ishin të mjaftueshme për të shkaktuar vdekjen. Një hetim i cili përfshin intervistën e pesë dëshmitarëve në një përpjekje për të rindërtuar orët e fundit të muzikantit 31-vjeçar, tregoi se ai ishte vetëm në kohën e rënies. Nga dhoma e hotelit të Payne u sekuestruan substanca që tregonin konsumimin e alkoolit dhe drogës. Ish-anëtari i One Direction vdiq të mërkurën në orën 17:00 me orën lokale.
Fotot që pretendonin të tregonin dhomën e Payne në rrëmujë, të publikuara në lajmet lokale dhe në internet, besohej se ishin marrë nga punonjësit e hotelit, duke shkaktuar një reagim të ashpër rreth etikës gazetareske. Një punonjës në hotel kishte thirrur shërbimet e urgjencës përpara rënies fatale për të kërkuar ndihmë për të menaxhuar sjelljen agresive të një klienti, duke thënë se ai dukej nën ndikim e drogës dhe alkoolit. Dëshmitarët thonë se dëgjuan zhurma të forta, duke përfshirë përplasje në momentet para vdekjes së tij. Payne u dërgua me urgjencë në spital, por lëndimet e tij ishin aq të rënda sa nuk ishte në gjendje të jetonte, thanë shërbimet e urgjencës.
“Mendova se po bënin ndërtime, kishte kaq shumë përplasje, dyer përplaseshin, shumicën e ditës. Ishte e zhurmshme, e çuditshme,” tha Doug Jones. “Më vonë dëgjova sirenat, duke menduar se diku kishte rënë zjarr. Dhe më pas dëgjova një britmë shumë të fortë.”
Policia që po heton vdekjen e papritur të Payne është në kërkim të dy dëshmitarëve kyç që mund të jenë ndër njerëzit e fundit që e kanë parë atë të gjallë. Këngëtari ka ndërruar jetë menjëherë në vendngnajrja pasi pësoi lëndime të shumta që çuan në hemorragji të brendshme dhe të jashtme. Hetuesit argjentinas po kërkojnë dy gra që kaluan kohë me Payne në hotelin Casa Sur një natë para vdekjes së tij tronditëse. Të dyja gratë thuhet se janë larguar nga hoteli dje pasi kanë pritur yllin në holl, raporton gazeta argjentinase Infobae.
Nuk ka asnjë indikacion se gratë mund të jenë të përfshira në vdekjen e tij, por policia shpreson se mund të ndihmojë në bashkimin e momenteve të fundit të Payne. Familja e Payne tha sot se ishin zemërthyer nga vdekja e tij tragjike dhe e parakohshme, duke shtuar se ish-ylli i One Direction do të jetojë përgjithmonë në zemrat e tyre: “Liami do të jetojë përgjithmonë në zemrat tona dhe ne do ta kujtojmë për shpirtin e tij të sjellshëm, qesharak dhe të guximshëm. Ne po e mbështesim njëri-tjetrin sa më mirë që mundemi si familje dhe kërkojmë privatësi dhe hapësirë në këtë kohë të tmerrshme.”
