Disa persona kanë humbur jetën në një aksident të rëndë rrugor që përfshiu një automjet policie dhe një Volkswagen Passat në orët e para të mëngjesit në Britani. Ngjarja ndodhi rreth orës 03:40 në autostradën A66, në zonën South Bank pranë Middlesbrough, në Teesside.
Sipas autoriteteve, automjeti i policisë u përplas me Volkswagen Passat. Numri i saktë i viktimave ende nuk është konfirmuar dhe policia po punon për identifikimin e tyre. Fillimisht ishte raportuar se në aksident ishin përfshirë tre automjete, por më pas policia e Clevelandit konfirmoi se bëhej fjalë për dy automjete.
Shërbimi i Ambulancës së Verilindjes së Anglisë deklaroi se dërgoi 14 ekipe në vendngjarje dhe përshkroi incidentin si një aksident “serioz”. Sipas këtij shërbimi, “një numër pacientësh kishin vdekur”. Në vendngjarje ndodhen një numër i madh automjetesh të shërbimeve të emergjencës.
Si pasojë e aksidentit, autostrada A66 është mbyllur në të dyja drejtimet në segmentin mes Normanby Road dhe Church Lane. Autoritetet kanë paralajmëruar se rruga pritet të qëndrojë e mbyllur për një kohë, dhe kanë kërkuar nga drejtuesit e mjeteve të përdorin rrugë alternative.
Hetimet për zbardhjen e plotë të rrethanave të aksidentit vijojnë. Policia po punon për të përcaktuar shkakun e përplasjes dhe për identifikimin e të vdekurve, ndërsa shërbimet e emergjencës vazhdojnë veprimet në vendin e ngjarjes.
