Inteligjenca Artificiale po përdoret gjithnjë e më shumë në industrinë muzikore, nga krijimi i melodive dhe zërave te prodhimi dhe përpunimi i këngëve, por ky zhvillim ngre shqetësime për ndikimin në krijimtarinë njerëzore. Si përgjigje, Australia ka vendosur rregulla të reja: këngët që janë krijuar tërësisht ose në pjesën më të madhe nga AI nuk do të pranohen në listat zyrtare muzikore të vendit.
Shoqata Australiane e Industrisë së Muzikës (ARIA) kërkon që, nga kjo javë, një këngë të jetë “në mënyrë thelbësore e krijuar nga njerëzit” për të qenë e pranueshme në klasifikime. Vendimi, sipas ARIA-s, synon të mbrojë dhe promovojë natyrën njerëzore të artit muzikor, duke vënë në dukje se artistët australianë po konkurrojnë për vëmendjen e publikut në një treg muzikor më të mbingarkuar se kurrë dhe organizata nuk dëshiron të promovojë suksesin e muzikës së gjeneruar nga AI kur i mungon krijimtaria njerëzore.
Rregullimi vjen pas një polemike mbi një version të këngës “Like A Prayer” të Madonna-s, të realizuar nga DJ australian Josh Faëaz, i cili arriti vendin e parë në klasifikimin dance të ARIA-s dhe të dytin në klasifikimin e përgjithshëm të Australisë, si dhe u dëgjua më shumë se 48 milionë herë në Spotify. Pas reagimeve dhe kritikave, Faëaz më vonë shtoi kreditet që tregonin përdorimin e Inteligjencës Artificiale në realizimin e këngës.
Rregullat e reja nuk ndalojnë përdorimin e AI si mjet ndihmës; AI mund të përdoret për sa kohë që kënga mbetet kryesisht produkt i punës njerëzore. Kërkesa specifikon që artistët duhet të kenë shkruar këngën, të kenë interpretuar vokalin kryesor dhe instrumentet kryesore. Përdorimi i teknikave si auto-tune, makinat e baterive apo AI për masterizim mbetet i lejuar. Për më tepër, artistët duhet të deklarojnë përdorimin e AI kur dorëzojnë një këngë për klasifikim.
Australia nuk është e vetme në ndërmarrjen e masave: më herët këtë vit, një këngë u përjashtua nga klasifikimet në Suedi pasi rezultoi se ishte krijuar nga AI. Federata Ndërkombëtare e Industrisë Fonografike (IFPI) ka njoftuar se udhëzime të ngjashme për muzikën e krijuar me AI do të zbatohen edhe në vende të tjera, duke përfshirë Amerikën Latine, Lindjen e Mesme, Afrikën dhe Azinë Juglindore.
