Harry Simpson është arrestuar nga policia në Angli në lidhje me vrasjen e Ardian Nikulajt në Shëngjin në Prill të këtij viti. Simpson me precendent penal në të shkuarën dyshohet se kishte rolin e njërit prej vëzhguesve në planin për vrasjen e biznesmenit.
Hetimet në Shqipëri zbuluan se Harry Simpson ditën kur u ekzekutua Ardian Nikulaj furnizonte me informacione vrasësi portugez Ruben Saraiva.
Po atë ditë u largua me urgjencë nga Shëngjini dhe mbërriti në Rinas përmes dy taksive. Sipas dosjes hetimore rrugës ai ndërroi rrobat dhe tentoi të kalonte kontrollin policor të kufirit në Rinas pa treguar pasaportën.
Fillimisht policia britanike refuzoi që ta arrestonte si të përfshirë, por pas dosjes me prova që çoi drejtësia shqiptare e prangosi. Tashmë pritet vendimi për ekstradimin e tij, por edhe të personave të tjerë me në krye Edmond Haxhinë, që akuzohet si organizator.
