Një 43-vjeçar me origjinë shqiptare, banues në Rimini të Italisë, u arrestua nga karabinierët, i akuzuar për dhunë në familje dhe kërcënime ndaj bashkëshortes dhe djalit të tij 22-vjeçar. Ngjarja ndodhi më 5 gusht në një hotel në Viserbella, ku policia u thirr me urgjencë nga djali gjatë një konflikti me të atin. Sipas mediave italiane, 43-vjeçari ndodhej në gjendje të dehur dhe i kërkonte bashkëshortes para për punën që ajo kishte kryer si pastruese shtëpie.
Situata u përshkallëzua kur burri tentoi të hidhte një biçikletë në drejtim të makinës së një klienti. Më pas ai goditi me grusht në fytyrë djalin e tij, i cili kishte ndërhyrë për të mbrojtur nënën. Për ta ndaluar të atin, 22-vjeçari e rrëzoi dhe e mbajti në tokë deri në mbërritjen e forcave të rendit, të cilat bënë arrestimin.
Mediat raportojnë gjithashtu se episodat e dhunës në familje nga ana e të dyshuarit kishin nisur rreth gjashtë vjet më parë. Në një nga rastet e mëparshme, 43-vjeçari, në gjendje të dehur, kishte hyrë në dhomën ku ndodheshin fëmijët duke mbajtur një rrip në dorë. Kur nëna tentoi t’i mbronte ata, burri e shtyu, dhe ajo përplasi kokën me dërrasën anësore të murit; përpara se të dërgohej në spital, ai kishte goditur edhe djalin e madh. Në urgjencë, gruaja ishte detyruar të mos tregonte të vërtetën dhe pati deklaruar se kishte rënë aksidentalisht.
Pas arrestimit, prokurori kërkoi vlerësimin e masës së arrestit dhe caktimin e masës së sigurisë “arrest me burg”, duke argumentuar ekzistencën e rrezikut që i dyshuari të përsërisë veprat. Lajmi u transmetua nga media italiane dhe më pas publikuar edhe nga Top Channel.
