Agjencia e Mbikëqyrjes Policore, Drejtoria Rajonale Kukës-Dibër, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Dibër dhe në prezencën e prokurorit të gatshëm, ka arrestuar në flagrancë punonjësin e Policisë së Shtetit Megin Gani Ademi, 32 vjeç, Specialist për Hetimin e Krimeve në Komisariatin e Policisë Dibër. Ademi akuzohet për veprën penale “Shpërdorim detyre”, parashikuar nga neni 248 i Kodit Penal.
Sipas hetimeve të zhvilluara nga Agjencia e Mbikëqyrjes Policore, punonjësi i policisë dyshohet se nuk ka kryer veprimet hetimore dhe procedurale të nevojshme lidhur me largimin e shtetasit Amir Muaremi. Muaremi ishte me masën e sigurisë “arrest në shtëpi” dhe ndodhej në proces ekstradimi drejt Republikës Federale të Gjermanisë. Nga materiali hetimor rezulton se, në lidhje me këto rrethana, Ademi nuk ka përmbushur detyrimet e parashikuara nga procedurat ligjore dhe hetimore që lidhen me largimin e shtetasit në fjalë.
Arrestimi i Ademit u krye në flagrancë dhe materialet procedurale të mbledhura nga Agjencia e Mbikëqyrjes Policore iu kaluan Prokurorisë për veprime të mëtejshme, sipas kompetencave ligjore. Rasti gjendet nën hetim dhe do të ndjekë procedurat përkatëse në bazë të materialeve dhe provave të siguruara gjatë veprimeve fillestare.
Agjencia e Mbikëqyrjes Policore deklaron se mbetet e angazhuar për të hetuar çdo paligjshmëri të kryer në rradhët e Policisë së Shtetit. Veprimet hetimore dhe procesuale, përfshirë transferimin e dosjes te Prokuroria, synojnë zbardhjen e plotë të rrethanave dhe përcaktimin e përgjegjësive ligjore në lidhje me këtë çështje.
