Një 62-vjeçar nga Përmeti u arrestua pas zbulimit se ai kishte përshtatur një ambient në banesën e tij në fshatin Qilarisht si thertore të paligjshme, ndërsa mbetjet e therjeve dyshohet se i shkarkonte në lumin Vjosë. Operacioni u zhvillua nga shërbimet e Komisariatit të Policisë Përmet dhe Seksioni për Hetimin e Krimeve Ekonomike e Financiare, në bashkëpunim me AKU Gjirokastër.
Gjatë kontrollit në ambientin e përshtatur si thertore u gjetën dhjetëra bagëti në proces therjeje dhe kafshë të therura. Po ashtu u sekuestruan dhjetëra matrikuj bagëtish që dyshohet se ishin të falsifikuara. Hetuesit konstatuan praninë e një tubacioni përmes të cilit mbetjet e therjes shkarkoheshin në lumin Vjosë, çka sipas njoftimit shkaktonte ndotje të ujërave dhe mjedisit.
AKU ndërhyri duke bllokuar ambientin ku ushtrohej aktiviteti i paligjshëm dhe vendosi ndaj pronarit masë administrative prej 200 000 lekësh të rinj. Pas përfundimit të veprimeve hetimore, specialistët për Hetimin e Krimeve Ekonomike dhe Financiare arrestuan në flagrancë shtetasin A. L., 62 vjeç, banues në Qilarisht, për veprat penale “Fshehja e të ardhurave”, “Prodhimi i kundërligjshëm i artikujve dhe mallrave industriale dhe ushqimore”, “Falsifikimi i vulave, stampave ose formularëve” dhe “Ndotja e ujërave”.
Në përfundim të kontrolleve, janë proceduar penalisht edhe dy veterinerë nga Përmeti, L. D., 54 vjeç, dhe Y. H., 66 vjeç, për veprën penale “Shpërdorimi i detyrës”, pasi dyshohet se nuk kanë ushtruar kontrolllet dhe nuk kanë marrë masat e kërkuara ligjore për bagëtitë e shtetasit 62-vjeçar. Materialet procedurale janë referuar Prokurorisë për veprime të mëtejshme.
Në njoftimin zyrtar të policisë theksohet se shërbimet vazhdojnë punën për parandalimin, evidentimin dhe goditjen e krimeve mjedisore dhe të çdo veprimtarie të paligjshme që dëmton mjedisin, cenon sigurinë ushqimore dhe rrezikon shëndetin e qytetarëve.
