Operacioni i koduar “Cross Border”, i realizuar nga Sektori për Hetimin e Narkotikëve dhe Trafiqeve të Paligjshme në DVP Korçë, së bashku me Komisariatin e Policisë Devoll, ka çuar në arrestimin e një 46-vjeçari dhe ka shpallur në kërkim një bashkëpunëtor pas një hetimi disa javor.
Veprimet u përqendruan në goditjen e aktiviteteve kriminale në fushën e narkotikëve. Gjatë operacionit, policia ndaloi një automjet të drejtuar nga Julian Belortaja, 46 vjeç, në fshatin Vishocicë, Devoll. Pas kontrollit, në një çantë sportive u gjetën 15 pako me natriban, me peshë totale 16 kilogramë, një lëndë narkotike kanabis sativa e dyshuar për t’u trafikuar drejt Greqisë.
Belortaja u arrestua në flagrancë, ndërsa bashkëpunëtori i tij, Danjel Mete, 37 vjeç, është shpallur në kërkim. Policia vazhdon të punojë për kapjen e Mete dhe për identifikimin e personave të tjerë të përfshirë.
Në kuadër të operacionit, janë sekuestruar gjithashtu automjeti dhe një celular i përdorur nga dy të dyshuarit. Hetimet po vazhdojnë nën drejtimin e Prokurorisë, me qëllim zbardhjen e plotë të kësaj veprimtarie kriminale. Materialet e procedurës janë referuar në Prokurorinë e Gjykatës së Shkallës së Parë të Korçës për veprime të mëtejshme.
