Policia e Durrësit ka arrestuar një 21-vjeçar, Klajdi Lleshi, i shpallur në kërkim për vjedhje automjetesh në Durrës dhe Dibër. Sipas njoftimit të Policisë, ai dyshohet se kishte vjedhur automjete për t’ua shitur personave me precedent kriminal, të cilët i përdornin për veprime të tjera të paligjshme.
Operacioni u realizua në bashkëpunim me Komisariatin e Policisë nr. 4 Tiranë dhe atë të Bulqizës, gjatë të cilit Lleshi u kap në flagrancë pas vjedhjes së një automjeti Benz në fshatin Gjoricë, pronë e shtetasit V. Xh. Hetimet kanë zbuluar se ai kishte vjedhur edhe tre automjete të tjera në lagjet nr. 15 dhe nr. 17 të Durrësit, si dhe sende personale nga një automjet tjetër.
Policia ka sekuestruar automjetet e vjedhura, përfshirë marka si Benz, Toyota, Volkswagen dhe Ford Focus, të cilat do të shërbejnë si prova materiale në procesin hetimor. Materialet procedurale janë dorëzuar tashmë në Prokurorinë pranë Gjykatës së Shkallës së Parë Durrës, ndërsa hetimet për zbardhjen e vjedhjeve të tjera që dyshohet se janë kryer nga Lleshi vazhdojnë.
