Policia ka finalizuar në Durrës operacionin ndërkombëtar të koduar “Fury”, gjatë të cilit u arrestuan dy persona të shpallur në kërkim nga autoritetet e Maqedonisë së Veriut për një sërë vepresh të rënda penale. Operacioni u zhvillua nga Drejtoria e Forcës së Posaçme Operacionale në Departamentin e Policisë Kriminale të Drejtorisë së Përgjithshme të Policisë së Shtetit, në bashkëpunim me Drejtorinë Vendore të Policisë Durrës, Shërbimin Diplomatik të Sigurisë (DSS) të ambasadave të SHBA-së në Tiranë dhe Shkup, si dhe homologët maqedonas.
Nën masa arresti ranë M. Xh., 26 vjeç, lindur në Shkup, dhe S. N., 34 vjeç, lindur në Norvegji. Për të dy ishte lëshuar urdhërarrest nga INTERPOL për akuza që përfshijnë vrasjen, plagosjen, armëmbajtjen pa leje dhe kryerjen e veprave penale në kuadër të një organizate kriminale në Republikën e Maqedonisë së Veriut. Sipas policisë, gjatë kapjes u gjetën dokumente identifikimi të dyshuara të falsifikuara, të cilat dyshohet se janë përdorur për dalje nga territori i Maqedonisë së Veriut dhe për shmangie të drejtësisë.
Gjatë vijimit të operacionit, u arrestua në flagrancë edhe shtetasi Xh. R., 26 vjeç, nga Maqedonia e Veriut, i dyshuar se u kishte siguruar dy të kërkuarve dokumentet false të identifikimit. Ai akuzohet për “Përkrahja e autorit të krimit” dhe “Falsifikimi i dokumenteve”. Gjatë kontrollit në banesën e tij u gjet dhe u sekuestrua një sasi e vogël e lëndës së dyshuar narkotike Cannabis Sativa.
Operacioni “Fury” është rezultat i një bashkëpunimi disa-mujor midis strukturave të Policisë së Shtetit dhe partnerëve ndërkombëtarë, përmes ekipeve të përbashkëta hetimore dhe veprimeve të koordinuara operacionale. Materialet procedurale janë referuar Prokurorisë për vijimin e hetimeve. Policia e Shtetit shprehu falënderim për partnerët amerikanë të DSS dhe autoritetet ligjzbatuese të Maqedonisë së Veriut për bashkëpunimin në këtë operacion. Burimi: Top Channel.
