Dy persona janë arrestuar në fshatin Balldre të Lezhës pasi u kapën me doza lëndësh narkotike. Policia bëri me dije se gjatë kontrollit në automjetin tip “Volksëagen” dhe në tre shtetasit që ishin në të, u gjetën doza të dyshuara narkotike, përfshirë kokainë dhe kanabis.
Arrestimet u realizuan për shtetasit L. M., 36 vjeç, dhe A. N., 19 vjeç, për veprën penale “Prodhimi dhe shitja e lëndëve narkotike”. Një tjetër shtetas, 17 vjeç, po ashtu u përfshi në hetim për të njëjtën akuzë.
Sipas njoftimit të policisë nga DVP Lezhë, veprimet u koordinuan nga specialistët për Hetimin e Narkotikëve, në bashkëpunim me Forcën e Posaçme “Shqiponja”. Operacioni u bazua në të dhënat operative për aktivitetet e paligjshme të këtyre shtetasve që shisnin lëndë narkotike.
Gjatë kontrolleve, përveç lëndëve narkotike që u gjetën në automjet, policia realizoi një kontroll në banesën e L. M., ku u identifikua edhe një sasi tjetër lënde të dyshuar narkotike. Në përfundim të veprimeve, u sekuestruan doza të lëndëve narkotike, automjeti e po ashtu tre celularë.
Materialet procedurale janë referuar Prokurorisë pranë Gjykatës së Shkallës së Parë Lezhë për veprime të mëtejshme. Operacionet e tilla vazhdojnë në Lezhë për evidentimin dhe goditjen e veprimtarive kriminale në fushën e narkotikëve, me qëllim për të zvogëluar trafikun dhe për të siguruar rendin publik.
