Ish-kryeministri Sali Berisha deklaroi sot se Edi Rama largoi me shpejtësi Gledis Nanon nga posti i drejtorit të policisë dhe Helidon Bendon nga SHISH pasi filluan të hetonin sinjalizimet nga autoritetet spanjolle lidhur me Amant Josifin, i arrestuar në Dubai me kërkesë të Madridit. Berisha thotë se pas Josifit, që ka qenë ish-këshilltar i Olta Xhaçkës te Ministria e Mbrojtjes, qëndron vëllai i kryeministri Rama, Olsi në skemën e mashtrimit me Call Center-at.
“Skema e Amant Josifit dhe Olsi Ramës shkon në mbi 2.4 miliardë Euro është realizuar nga grupi “Milton” që kishte 15 qendra call center në Ukrainë, Gjeorgji dhe Shqipëri, që ishte vend lider. Grupi ishte në patronimin e Olsi Ramës dhe për rrjedhojë të Edi Ramës. Përpjekpjet e zyrtarëve shqiptarë për të krijuar hapësirën e nevojshme për hetimin e kësaj cështje u hasën me shkarkimin e tyre. Ish-drejtori i policisë (Gledis Nano) u shkarkua në mënyrë brutale vetëm sepse informacionin që mori nga partnerët e dërgoi në destinacionet e duhura. Helidon Bendo, edhe duket se largimi me urgjencë i tij nga SHISH ka lidhje me këtë super skandal ndërkombëtar” tha ai.
