Gentian Çipi, 41 vjeç, lindur në Korçë dhe banues në Dishnicë të Korçës, është i burgosuri që u arratis mbrëmjen e djeshme në mënyrë spektakolare nga spitali i Serres në Greqi. Ai rezulton me precedentë të rëndë penalë në Shqipëri dhe në Greqi.
Në Shqipëri, Çipi u dënua në korrik 2024 me 2 vjet burg për “shkatërrim i pronës me zjarr” të kryer në bashkëpunim dhe në rrethana rënduese; ngjarja është e lidhur me djegien e një automjeti më 24 prill 2023 në lagjen 13, Rruga “Loni Grazhdani” në Korçë. Fillimisht ishte vënë nën masën “Arrest në burg”, por më pas gjykata e zbuti masën në “Ndalimi i daljes jashtë shtetit” dhe “Garancia pasurore”. Në janar 2023, në kuadër të operacionit “Fijet”, policia e procedoi për vendosje të paligjshme të kamerave pranë banesës së tij.
Në Greqi, më 3 shtator 2024 Çipi hapi zjarr në Pylaia të Selanikut, duke tentuar të vrasë një 25-vjeçar grek jashtë një kantine; i plagosuri mori tre plumba por mbijetoi, ndërsa Çipi arratisi. Policia greke e identifikoi dhe organizoi një operacion kapjeje në shtator 2025. Gjatë këtij operacioni u arrestuan edhe Enea Basholli, 31 vjeç, dhe Kleo Topa, 24 vjeçe, të dy nga Korça. Sipas policisë greke, Çipi konsiderohet kreu i një grupi kriminal që merret me trafik droge dhe veprime të dhunshme.
Gjatë tentativës për t’i kapur në Selanik, Çipi dhe Topa nuk iu bindën urdhrit të policisë; shtuan shpejtësinë e mjetit, kryen manovra të rrezikshme dhe përplasën një automjet policie. Ata braktisën mjetin dhe u larguan në këmbë, por u kapën më vonë; pak orë më pas, në zonën e Halkidikisë, u arrestua edhe Enea Basholli.
Gjatë kontrolleve të kryera nga policia greke u gjetën dhe sekuestruan një Kallashnikov me 30 fishekë, tre pistoleta, një silenciator, rreth 31 kg marijuanë, pasaportë dhe patentë false, 23,350 euro, celularë dhe tre automjete.
