Avokatët e kryebashkiakut Erion Veliaj reaguan pas shtyrjes së seancës në Gjykatën e Apelit, duke kërkuar shfuqizimin e vendimit të shkallës së parë të Gjykatës së Posaçme. Sipas tyre, vendimi i shkallës së parë ka pezulluar afatet e paraburgimit të Veliajt për arsyë që lidhen me një subjekt tjetër të procedimit penal, duke kthyer një çështje individuale në një pasojë kolektive dhe duke cenuar parimin e përgjegjësisë individuale.
Në deklaratën për mediat, avokatët shpjegojnë se shqyrtimi në Apel u shty për shkak të një detaji formal në firmën e Drejtorit të Burgut, një çështje që gjykata e konsideroi të rëndësishme për integritetin e procesit ligjor dhe të cilën mbështesin. Megjithatë, theksojnë se thelbi i çështjes mbetet i pandryshuar dhe shqetësues: vendimi i shkallës së parë, sipas mbrojtjes, krijon një precedent që lejon transformimin e pezullimit të afateve të paraburgimit në një formë ndëshkimi kolektiv.
Avokatët argumentojnë se një sjellje procedurale individuale, në këtë rast e mbrojtëses së një subjekti tjetër, është përdorur për të zgjatur kufizimin e lirisë së personave që nuk kanë lidhje me këtë sjellje. Ligji, thonë ata, e lidh pasojën procedurale me sjelljen e individit konkret, dhe askush tjetër nuk duhet të mbajë përgjegjësi për konfigurimin e procedimit penal, që sipas avokatëve është produkt i organit të akuzës. Sipas tyre, është juridikisht i papranueshëm dhe logjikisht absurd që liria e një personi të varet nga sjellja procedurale e një tjetri pa lidhje.
Mbrojtja e konsideron këtë një deformim të rëndë të drejtësisë, duke theksuar se paraburgimi është masa më e rëndë para një vendimi penal dhe duhet të zbatohet vetëm mbi baza strikte individuale. Çdo devijim nga ky standard përbën, sipas tyre, një cenim të lirive personale dhe të parimit të shtetit të së drejtës. Avokatët presin që Gjykata e Apelit të rikthejë balancën ligjore dhe kushtetuese, duke korrigjuar vendimin që, siç thonë, zgjat paraburgimin pa bazë individuale dhe pa mbështetje ligjore.
