Ankaraja është vënë në gatishmëri të plotë para samitit të NATO-s, ku pritet të mbërrijnë drejtuesit e 32 vendeve anëtare, përfshirë presidentin amerikan Donald Trump. Autoritetet turke kanë ndërmarrë masa të shumta sigurie dhe pamjeje të kryeqytetit, ndërsa kufizimet e forta kanë shkaktuar pakënaqësi te banorët dhe opozita. Punonjësit e bashkisë po mbjellin lule, po lyejnë trotuaret dhe po mbulojnë me tabela gjigante zonat e amortizuara dhe lagjet e varfra, me synimin që qyteti të lërë përshtypjen më të mirë te delegacionet e huaja.
Për shkak të masave të sigurisë, shumë akse kryesore do të qëndrojnë të bllokuara gjatë ditëve të samitit, ndërsa nga 28 qershori deri më 8 korrik është ndaluar çdo tubim apo protestë në kryeqytet. Opozita ka reaguar me forcë; bashkëkryetari i Partisë DEM, Tuncer Bakırhan, deklaroi se Ankaraja është shndërruar në një “burg të hapur”, duke akuzuar autoritetet se po paralizojnë jetën e qytetit për të lehtësuar lëvizjen e autokolonave zyrtare.
Sipas mediave turke, përgatitjet për samitin, që përfshijnë rinovimin e një aeroporti ushtarak dhe ndërtimin e infrastrukturës së re, kanë kushtuar mbi 11 miliardë lira turke, ose më shumë se 205 milionë euro; qeveria i konsideron këto investime si pjesë të modernizimit të kryeqytetit. Ndërkohë, tregtarët ankohen për humbje të mëdha ekonomike, shumë dyqane janë mbyllur përkohësisht për shkak të bllokimit të rrugëve dhe mungesës së klientëve.
Nga ana tjetër, Federata Turke e Shoferëve të Taksive ka organizuar një fushatë mikpritjeje për vizitorët: shoferëve u është kërkuar të vishen me këmisha të bardha dhe pantallona gri, ndërsa pasagjerëve do t’u ofrohen ujë, llokum dhe kolonjë tradicionale turke. Për herë të parë në Ankara do të patrullojnë edhe policë të hipur në kuaj, ndërsa autoritetet kanë riparuar gropat në rrugë, kanë niveluar kapakët e pusetave dhe kanë sistemuar infrastrukturën para mbërritjes së liderëve.
Masat kanë nxitur edhe reagime ironike në rrjetet sociale, ku përdoruesit vënë në dukje se investime të tilla duhej të ishin në shërbim të qytetarëve dhe jo vetëm për vizitat e personaliteteve të huaja. Për të shmangur kaosin e trafikut dhe kufizimet, shumë banorë kanë zgjedhur të largohen nga Ankaraja për disa ditë, duke mbushur trenat dhe autobusët drejt qyteteve të tjera.
